معروف اداکارہ و میزبان ندا یاسر نے حال ہی میں اپنے ساتھ پیش آنے والے ایک غیر متوقع مگر سبق آموز واقعے کا انکشاف کیا ہے، جس کا تعلق ان کے گھر کام کرنے والی ایک فلپائنی ملازمہ سے ہے۔ ندا کے مطابق یہ ملازمہ ان کے بیٹے کی پیدائش کے بعد نگہداشت کے لیے رکھی گئی تھی، جو بظاہر بہت پیشہ ور اور قابلِ اعتماد لگتی تھی، اس لیے انہوں نے اس پر مکمل بھروسہ کر لیا۔ تاہم کچھ وقت بعد گھر سے قیمتی اشیاء کا غائب ہونا شروع ہوا، لیکن انہیں کبھی اس ملازمہ پر شک نہیں ہوا۔ ایک دن جب انہوں نے خریداری کے دوران اپنا پرس ملازمہ کو تھما دیا، تو بعد میں اندازہ ہوا کہ اس میں رکھے گئے 300 یوروز غائب ہیں، جس پر ندا نے صورتحال کی سنجیدگی کو بھانپتے ہوئے چھان بین کا فیصلہ کیا۔

ملازمہ نے چھٹی کی درخواست کی جو ندا نے منظور کرلی، مگر خود بھی اس کے ساتھ اس کے رہائشی مقام تک گئیں۔ وہاں جا کر ندا کو حیرت کا جھٹکا لگا جب انہیں اپنے ہی گھر کے سامان سے بھرے ہوئے تین بیگ ملے جن میں قیمتی اشیاء، برانڈڈ کپڑے، موبائل فون اور وہی رقم بھی موجود تھی جو گمشدہ تھی۔ اگرچہ ندا قانونی کارروائی کا حق رکھتی تھیں، مگر چونکہ ملازمہ کافی عرصے سے ان کے ساتھ کام کر رہی تھی اور چوری شدہ اشیاء واپس مل چکی تھیں، اس لیے انہوں نے پولیس کیس نہ بناتے ہوئے صرف ایجنسی کو تفصیلی شکایت بھیج دی جس کے ذریعے وہ ملازمہ آئی تھی۔

ندا یاسر نے اس واقعے کو ایک ناخوشگوار تجربہ قرار دیا اور اسے ایک سبق کے طور پر لیتے ہوئے عوام کو مشورہ دیا کہ گھریلو ملازمین کے حوالے سے ہر ممکن احتیاط برتی جائے، چاہے وہ کتنے ہی قابلِ اعتماد کیوں نہ لگیں۔

پاکستان شوبز کی سینئر اور محترم اداکارہ اسما عباس نے بھارتی اداکارہ اور مشہور ڈانسر شیفالی زری والا کی اچانک موت پر دکھ کا اظہار کرتے ہوئے خواتین کو اہم مشورہ دیا ہے۔ اپنی ایک ویڈیو پیغام میں اداکارہ اسما عباس نے کہا کہ میڈیا رپورٹس کے مطابق شیفالی، جو صرف 42 سال کی تھیں، مبینہ طور پر اینٹی ایجنگ انجیکشن کے باعث دل کا دورہ پڑنے سے انتقال کر گئیں۔ اداکارہ کا کہنا تھا کہ وہ یہ بات سمجھنے سے قاصر ہیں کہ لوگ بڑھتی عمر کو قبول کرنے میں ہچکچاہٹ کیوں محسوس کرتے ہیں اور خود کو جوان دکھانے کے لیے خطرناک پروسیجرز کیوں کرواتے ہیں۔ اسما عباس نے خواتین پر زور دیا کہ وہ فخر کے ساتھ عمر کو قبول کریں اور اینٹی ایجنگ انجیکشنز جیسے طریقوں سے دور رہیں کیونکہ یہ دل کو متاثر کرتے ہیں۔ انہوں نے کہا کہ شیفالی کی ماں اور شوہر پر جو قیامت گزری ہے، وہ ناقابل بیان ہے۔ واضح رہے کہ شیفالی زری والا ماضی کے مشہور گانے “کانٹا لگا” سے شہرت حاصل کر چکی تھیں اور ان کی اچانک موت نے خوبصورتی کے لیے کیے جانے والے طبی اقدامات پر کئی سوالات کھڑے کر دیے ہیں۔