امریکی صدر ڈونلڈ ٹرمپ نے خبردار کیا ہے کہ جو ممالک برکس (BRICS) کی امریکا مخالف پالیسیوں کی حمایت کریں گے، ان پر 10 فیصد اضافی ٹیرف، یعنی درآمدی ٹیکس عائد کیا جائے گا۔ سوشل میڈیا پلیٹ فارم “ٹروتھ سوشل” پر جاری اپنے پیغام میں ٹرمپ نے واضح کیا کہ اس پالیسی میں کسی بھی ملک کے لیے کوئی رعایت نہیں رکھی جائے گی۔ انہوں نے مزید کہا کہ امریکا آج سے مختلف ممالک کو خطوط ارسال کرے گا جن میں ہر ملک کے لیے مخصوص ٹیرف کی شرح اور تجارتی معاہدوں کی تفصیلات درج ہوں گی۔

صدر ٹرمپ نے اس اعلان کے ساتھ واضح کر دیا کہ یہ قدم امریکا کے اقتصادی اور سیاسی مفادات کے تحفظ کے لیے ناگزیر ہے۔ ان کا کہنا تھا کہ اب وقت آ گیا ہے کہ امریکی مخالف پالیسیوں کو عملی طور پر جواب دیا جائے۔

اس سے قبل، امریکی صدر نے وائٹ ہاؤس میں منعقدہ ایک تقریب کے دوران “بگ بیوٹی فل بل” پر دستخط کیے تھے، جس کے تحت ٹیکس میں کمی، دفاعی بجٹ میں اضافہ اور امیگریشن قوانین کو سخت کرنے جیسے اقدامات کو قانونی حیثیت دی گئی۔ ٹرمپ نے اس موقع پر کہا کہ یہ بل امریکا کی تاریخ کا بہترین قانون ہے، جو معاشی ترقی کے نئے دروازے کھولے گا۔

یومِ آزادی کے موقع پر خطاب کرتے ہوئے صدر ٹرمپ نے دعویٰ کیا کہ بائیڈن دورِ حکومت میں 21 ملین افراد غیر قانونی طور پر امریکا میں داخل ہوئے، مگر اب امریکی سرحدیں پہلے سے زیادہ محفوظ ہو چکی ہیں۔ انہوں نے امریکی فضائیہ کے حالیہ آپریشنز کا حوالہ دیتے ہوئے کہا کہ ایران میں کیا گیا کامیاب حملہ امریکا کی بحال شدہ عسکری طاقت کا مظہر ہے۔ ٹرمپ نے زور دیا کہ “ہم امریکا کو دوبارہ عظیم ترین ملک بنائیں گے۔”

آزاد کشمیر کے سابق وزیراعظم سردار تنویر الیاس کے ترجمان سردار مشعل یونس نے عمران خان کے خلاف مبینہ بیانات کی سختی سے تردید کرتے ہوئے کہا ہے کہ سوشل میڈیا پر جاری ویڈیوز، ٹکرز اور اخباری تراشے سراسر جھوٹ اور من گھڑت ہیں، جن میں آرٹیفیشل انٹیلیجنس کا استعمال کر کے غلط بیانی کی جا رہی ہے۔ انہوں نے واضح کیا کہ یہ سب ایک منظم پروپیگنڈہ مہم ہے، جس کا مقصد شر انگیزی پھیلانا اور سیاسی طور پر گمراہ کرنا ہے۔

ترجمان کا کہنا تھا کہ سردار تنویر الیاس 24 جون 2025ء سے باقاعدہ طور پر پاکستان پیپلز پارٹی میں شامل ہو چکے ہیں اور اب پارٹی کے آئین، منشور اور پالیسیوں کے پابند ہیں۔ انہوں نے واضح کیا کہ سردار تنویر الیاس نے نہ تو پی ٹی آئی اور نہ ہی عمران خان یا کسی دیگر سیاسی جماعت یا قیادت کے خلاف کوئی بیان جاری کیا ہے۔

انہوں نے مزید کہا کہ ہم جمہوری تسلسل، سیاسی رواداری اور اخلاقی اقدار کے قائل ہیں اور تمام سیاسی جماعتوں اور ان کی قیادت کا احترام کرتے ہیں۔ ترجمان نے اس بات پر زور دیا کہ جعلی اور بے بنیاد بیانات اور ویڈیوز کے خلاف سردار تنویر الیاس کی قانونی ٹیم سائبر کرائم ڈیپارٹمنٹ میں ٹھوس شواہد کے ساتھ قانونی چارہ جوئی میں مصروف ہے۔

انہوں نے عوام سے اپیل کی کہ وہ سوشل میڈیا پر چلنے والے جھوٹے پروپیگنڈے پر یقین نہ کریں کیونکہ ان کا حقیقت سے کوئی تعلق نہیں ہے اور یہ سب ایک مخصوص منفی ایجنڈے کے تحت کیا جا رہا ہے۔