امریکہ کی پاک بھارت کشیدگی پر تشویش، مذاکرات پر زور

واشنگٹن: امریکی وزیر خارجہ مارکو روبیو نے پاک بھارت وزرائے اعظم کی جانب سے امن کے راستے کو اپنانے پر ان کی دانشمندی کو سراہا ہے۔ انہوں نے کہا کہ امریکہ دونوں ممالک کے درمیان براہ راست بات چیت کا حامی ہے اور روابط کو بہتر بنانے کی ہر کوشش کی حوصلہ افزائی کرتا ہے۔

مارکو روبیو نے برطانوی وزیر خارجہ ڈیوڈ لیمی سے ٹیلیفون پر رابطہ کیا اور خطے کی صورتحال پر تبادلہ خیال کیا۔ دونوں رہنماؤں نے جنوبی ایشیائی ممالک پر جنگ بندی قائم رکھنے اور مسلسل رابطے کی ضرورت پر زور دیا۔ امریکی صدر ڈونلڈ ٹرمپ نے بھی مکمل جنگ بندی اور براہ راست مذاکرات کی اہمیت پر زور دیا ہے۔

وزیر خارجہ نے جرمن چانسلر فریڈرک مرز سے بھی یوکرین جنگ سمیت عالمی سکیورٹی صورتحال پر گفتگو کی۔ امریکی مؤقف کے مطابق، امریکہ جنوبی ایشیا میں امن اور استحکام کے لیے پرعزم ہے۔

قبل ازیں مارکو روبیو نے وزیراعظم پاکستان شہباز شریف اور پاکستانی ہم منصب اسحاق ڈار سے بھی ٹیلیفونک رابطے کیے۔ اسحاق ڈار نے بھارتی حملوں کی تفصیلات بتاتے ہوئے کہا کہ پاکستان نے دفاع میں جوابی کارروائی کی۔ ان کا کہنا تھا کہ بھارت نے بارڈر کی خلاف ورزی کی اور پاکستان کے پاس دفاع کے سوا کوئی چارہ نہیں رہا۔

امریکی وزیر خارجہ نے حالیہ کشیدگی میں شہری ہلاکتوں پر افسوس کا اظہار کرتے ہوئے زور دیا کہ دونوں ممالک کو کشیدگی کم کرنے اور امن قائم رکھنے کے لیے مل کر کام کرنا ہوگا۔