سندھ کے سینئر وزیر شرجیل انعام میمن نے کہا ہے کہ صوبے میں اس وقت کوئی ہنگامی صورتحال نہیں ہے، لیکن ملک میں جاری سیلابی حالات کے پیش نظر سندھ حکومت نے تمام تر تیاری مکمل کر لی ہے۔ کراچی میں ایک پریس کانفرنس سے خطاب کرتے ہوئے ان کا کہنا تھا کہ وزیر اعلیٰ سندھ سید مراد علی شاہ نے متعلقہ تمام انتظامیہ کو الرٹ کر دیا ہے اور ضرورت پڑنے پر لوگوں کو محفوظ مقامات پر منتقل کیا جائے گا۔

شرجیل میمن نے بتایا کہ پروونشل ڈیزاسٹر مینجمنٹ اتھارٹی (پی ڈی ایم اے) نے ممکنہ سیلاب سے نمٹنے کے لیے پیشگی اقدامات کر لیے ہیں۔ پنجاب میں آنے والی حالیہ سیلابی تباہ کاریوں پر اظہارِ ہمدردی کرتے ہوئے انہوں نے کہا کہ سندھ حکومت اور پاکستان پیپلز پارٹی پنجاب حکومت کے ساتھ کھڑی ہے، اور ہم نے پنجاب اور خیبرپختونخوا کی حکومتوں کو ہر ممکن مدد کی پیشکش کی ہے۔

انہوں نے مزید بتایا کہ چیئرمین پیپلز پارٹی بلاول بھٹو زرداری صورت حال پر نظر رکھے ہوئے ہیں اور صوبائی وزرا سے مسلسل رابطے میں ہیں۔ وزیر آبپاشی جام خان شورو دریائے سندھ کے اطراف متاثرہ علاقوں کا دورہ کر رہے ہیں، جبکہ کچے کے علاقوں سے لوگوں کے انخلا کا عمل بھی شروع ہو چکا ہے۔ اس کے علاوہ کمشنرز اور ڈپٹی کمشنرز کو بھی ضروری ہدایات جاری کر دی گئی ہیں۔

شرجیل میمن نے نشاندہی کی کہ اگرچہ ملک میں ڈیمز کی کمی کا ذکر کیا جاتا ہے، لیکن اصل مسئلہ یہ ہے کہ لوگوں نے دریاؤں کے قدرتی راستوں میں ہاؤسنگ سوسائٹیاں اور مکانات بنا رکھے ہیں، جو سیلابی تباہی کا باعث بنتے ہیں۔ ان کا کہنا تھا کہ سندھ میں فی الحال ایمرجنسی نافذ نہیں کی گئی، تاہم وزیر اعلیٰ نے صورتحال کی نگرانی کے لیے ایک خصوصی سیل قائم کر دیا ہے، اور پی ڈی ایم اے ہر ممکن حفاظتی اقدامات میں مصروف ہے۔

پنجاب میں مون سون بارشوں کے ایک اور اسپیل کی پیشگوئی کر دی گئی ہے جس کے باعث صوبے بھر میں سیلابی صورتحال مزید سنگین ہوسکتی ہے۔ صوبائی ڈیزاسٹر مینجمنٹ اتھارٹی (پی ڈی ایم اے) کے مطابق مون سون کا 9واں اسپیل 29 اگست سے 2 ستمبر تک جاری رہے گا، اس دوران لاہور، گجرانوالہ، راولپنڈی، مری، گلیات، اٹک، جہلم، چکوال، گجرات اور سیالکوٹ سمیت جنوبی پنجاب کے ڈیرہ غازی خان، ملتان اور راجن پور میں بھی شدید بارشوں کا امکان ہے۔ پی ڈی ایم اے نے خبردار کیا ہے کہ دریائے چناب، راوی اور ستلج میں انتہائی اونچے درجے کا سیلاب ہے جبکہ بڑے شہروں میں ندی نالے بپھر سکتے ہیں۔ وزیر اعلیٰ پنجاب کی ہدایت پر ضلعی انتظامیہ اور متعلقہ اداروں کو الرٹ جاری کر دیا گیا ہے اور تمام کمشنرز، ڈپٹی کمشنرز سمیت محکمہ صحت، آبپاشی، تعمیر و مواصلات اور لوکل گورنمنٹ کو بھی ہدایت دی گئی ہے کہ وہ فیلڈ میں موجود رہیں۔ شہریوں سے اپیل کی گئی ہے کہ وہ خراب موسم میں غیر ضروری سفر سے گریز کریں، دریاؤں کے اطراف جانے سے بچیں اور ہنگامی صورتحال میں پی ڈی ایم اے ہیلپ لائن 1129 پر رابطہ کریں۔