news
شہباز شریف کا ترک صدر اردوان سے رابطہ، بھارتی جارحیت پر حمایت پر شکریہ
اسلام آباد: وزیراعظم محمد شہباز شریف نے ترک صدر رجب طیب اردوان کا مشکل وقت میں پاکستان سے اظہار یکجہتی اور حمایت پر شکریہ ادا کرتے ہوئے کہا ہے کہ پاکستان جنوبی ایشیا میں قیامِ امن اور کشیدگی میں کمی کے لیے ترکیہ کی کوششوں کو قدر کی نگاہ سے دیکھتا ہے۔
وزیراعظم نے ترک صدر سے ٹیلیفون پر گفتگو میں بھارت کی حالیہ بلااشتعال جارحیت اور اس کے نتیجے میں ہونے والے شہداء کے لیے ترکیہ کی جانب سے دعاؤں اور نیک تمناؤں پر خیر مقدم کیا۔ انہوں نے کہا کہ پاکستان کی مسلح افواج نے دشمن کو دلیرانہ اور پیشہ ورانہ انداز میں جواب دیا اور ہم اپنی خودمختاری اور علاقائی سالمیت کا ہر قیمت پر تحفظ کریں گے۔
ترک وزیر خارجہ حاقان فدان نے بھی پاکستانی نائب وزیراعظم اسحاق ڈار سے ٹیلیفون پر رابطہ کیا اور بھارت کی جانب سے پاکستانی خودمختاری کی خلاف ورزی اور شہریوں کی شہادت پر گہری تشویش کا اظہار کیا۔ ترکیہ نے پاکستان کی مکمل حمایت اور قریبی تعاون برقرار رکھنے پر زور دیا۔
ترک قیادت نے بھارت کی کارروائی کو پاکستان کی خودمختاری کی خلاف ورزی قرار دیتے ہوئے مکمل یکجہتی کا اعادہ کیا، جب کہ دونوں ممالک نے باہمی مشاورت اور رابطے میں رہنے پر اتفاق کیا تاکہ خطے میں امن قائم رکھنے کے لیے مشترکہ کوششیں جاری رکھی جا سکیں