چین کے وزیر خارجہ وانگ یی نے مشرق وسطیٰ کی حالیہ کشیدہ صورتحال پر شدید تشویش کا اظہار کرتے ہوئے اسرائیل کے اقدامات کو علاقائی امن و استحکام کے لیے خطرہ قرار دیا ہے۔ عالمی میڈیا کے مطابق چینی وزیر خارجہ وانگ یی کا کہنا تھا کہ اسرائیل نے بین الاقوامی قوانین اور عالمی تعلقات کے اصولوں کی سنگین خلاف ورزی کی ہے، اور چین اس صورتحال پر خاموش تماشائی بن کر نہیں بیٹھ سکتا۔ انہوں نے کہا کہ موجودہ حالات میں صحیح اور غلط بالکل واضح ہیں اور دنیا کو اس بگڑتی صورتحال کو نظر انداز نہیں کرنا چاہیے، خاص طور پر خطے کے ممالک کو متحد ہوکر جنگ کی مخالفت اور امن کی وکالت کرنی چاہیے۔

چینی وزارت خارجہ کی جانب سے جاری بیان کے مطابق وانگ یی نے عمان کے وزیر خارجہ سید بدر بن حمد بن حمود البوسیدی سے ٹیلیفون پر بات کی جس میں انہوں نے اسرائیلی اقدامات پر سخت ردعمل دیا۔ وانگ یی کا کہنا تھا کہ ایران کی خودمختاری اور سلامتی کی خلاف ورزی ہوئی ہے اور اس تنازعے نے ایرانی جوہری مسئلے پر بالواسطہ مذاکرات کے نازک عمل کو بھی متاثر کیا ہے۔ ان کے مطابق اس موقع پر عالمی برادری، خاص طور پر علاقائی ممالک کو، امن کے قیام، انصاف کی بحالی اور سیاسی تصفیے کے فروغ کے لیے مؤثر کردار ادا کرنا چاہیے۔

چینی وزیر خارجہ نے اپنے مصری ہم منصب بدر عبداللطیف سے بھی رابطہ کیا اور اسرائیل کے اقدامات کو مشرق وسطیٰ میں اچانک کشیدگی کی بنیادی وجہ قرار دیا۔ انہوں نے خبردار کیا کہ اگر فوری طور پر جنگ بندی نہ کی گئی تو صورتحال قابو سے باہر ہو سکتی ہے۔ چین نے ایک بار پھر اسرائیل اور دیگر فریقین پر زور دیا ہے کہ وہ عوامی مفادات کو ترجیح دیتے ہوئے فوری جنگ بندی کریں، کشیدگی کم کریں اور مذاکرات کی بحالی کے لیے راہ ہموار کریں۔ وانگ یی نے مصر کی جانب سے 20 عرب اور اسلامی ممالک کے مشترکہ بیان کو مربوط کرنے کی کوششوں کو سراہا اور اس کی مکمل حمایت کا اعلان کیا، جس میں جنگ بندی، دشمنی کے خاتمے اور ایرانی جوہری مذاکرات کی بحالی کا مطالبہ شامل ہے

معروف اداکار اور میزبان حمزہ علی عباسی نے شوبز سے کنارہ کشی کے حوالے سے گردش کرنے والی خبروں پر حالیہ پوڈکاسٹ میں وضاحت پیش کرتے ہوئے کہا ہے کہ انہوں نے کبھی شوبز کو مکمل طور پر خیرباد نہیں کہا تھا بلکہ محض ایک وقتی وقفہ لیا تھا۔ انہوں نے بتایا کہ اپنی ویڈیو میں انہوں نے واضح الفاظ میں کہا تھا کہ وہ شوبز چھوڑ نہیں رہے بلکہ کچھ وقت کے لیے بریک لے رہے ہیں، لیکن اگلے ہی دن میڈیا پر ایسی خبریں گردش کرنے لگیں کہ گویا وہ انڈسٹری کو خیرباد کہہ چکے ہیں۔ حمزہ علی عباسی نے اس بات پر افسوس کا اظہار کیا کہ لوگ اکثر مکمل ویڈیوز دیکھنے کے بجائے صرف مختصر کلپس پر اپنی رائے قائم کرتے ہیں، جس سے بات کا مفہوم بگڑ جاتا ہے۔ انہوں نے مزید بتایا کہ وہ اسلامی تعلیمات کے طالب علم ہیں اور اسکالر جاوید احمد غامدی کے نظریات سے متاثر ہوکر اسلام سیکھنے کے لیے امریکا بھی گئے تھے۔ حمزہ نے کہا کہ بدقسمتی سے ہمارے معاشرے میں دین اور شوبز کو ایک دوسرے کی ضد سمجھا جاتا ہے، یہی وجہ ہے کہ ان کے بیان کو بھی غلط انداز میں پیش کیا گیا۔ یاد رہے کہ 2019 میں سوشل میڈیا پر یہ افواہیں گردش کر رہی تھیں کہ حمزہ علی عباسی نے شوبز کو خیرباد کہہ دیا ہے، تاہم کچھ عرصے بعد وہ مختلف پراجیکٹس میں دوبارہ جلوہ گر ہوئے تھے۔