وزیراعظم شہباز شریف نے وفاقی کابینہ کے اجلاس سے خطاب کرتے ہوئے ایران اور اسرائیل کے درمیان ہونے والی جنگ بندی کو خوش آئند قرار دیا اور کہا کہ پاکستان نے اس کشیدگی کے دوران برادر اسلامی ملک ایران کی بھرپور اور مستقل حمایت کی۔ وزیراعظم شہباز شریف نے بتایا کہ ایران نے صدر آصف علی زرداری، ان کی ذات اور فیلڈ مارشل عاصم منیر کا نام لے کر شکریہ ادا کیا، جو اس بات کا ثبوت ہے کہ پاکستان نے ایران کے دفاع میں سفارتی سطح پر اہم کردار ادا کیا۔ اجلاس میں کابینہ کو قومی سلامتی کمیٹی کے فیصلوں پر اعتماد میں لیا گیا اور وزیراعظم و فیلڈ مارشل کے موثر کردار پر قرارداد کی منظوری بھی دی گئی۔ وزیراعظم نے کہا کہ آرمی چیف نے استنبول میں ایرانی وزیر خارجہ سے جو اہم ملاقات کی، اس سے دوطرفہ تعلقات میں مزید مضبوطی آئی۔

اجلاس کے دوران وزیراعظم نے مالی سال 2025-26 کے بجٹ کی منظوری کو ایک قومی کامیابی قرار دیا اور وزیر خزانہ سمیت ان کی پوری ٹیم کو خراج تحسین پیش کیا۔ انہوں نے پیپلز پارٹی کی قیادت، نائب وزیراعظم اور اتحادی جماعتوں کی کوششوں کو بھی سراہا۔ کابینہ نے پیٹرولیم لیوی کے تعین کا اختیار پیٹرولیم ڈویژن کو دینے کی منظوری دے دی۔ شہباز شریف نے پاک فوج کی قربانیوں کو سراہتے ہوئے کہا کہ فوج نے ملک میں امن دشمن عناصر، خصوصاً فتنہ الخوارج کے خلاف بھرپور کارروائیاں کیں اور دشمن کو شکست فاش دی۔

وزیراعظم نے فیلڈ مارشل عاصم منیر کی قائدانہ صلاحیتوں کی تعریف کرتے ہوئے کہا کہ نہ صرف پاکستان بلکہ امریکی صدر نے بھی ان کے کردار کو سراہا ہے۔ محرم الحرام کی آمد پر وزیراعظم نے قوم سے اپیل کی کہ وہ مجالس اور جلوسوں میں امن، بھائی چارے اور مذہبی رواداری کا مظاہرہ کریں تاکہ فرقہ واریت کی کوئی گنجائش نہ رہے۔ انہوں نے وفاق اور صوبوں کو امن و امان برقرار رکھنے کے لیے مؤثر اقدامات کی ہدایت بھی جاری کی

شنگھائی تعاون تنظیم کے وزرائے دفاع کے حالیہ اجلاس میں پاکستان نے ایک اہم سفارتی کامیابی حاصل کی، جہاں بھارت کی جانب سے پہلگام واقعے کو پاکستان سے جوڑنے کی کوشش ناکام بنا دی گئی۔
شنگھائی تعاون تنظیم کے مشترکہ اعلامیے میں بلوچستان میں دہشت گردی کی کھل کر مذمت کی گئی، تاہم بھارت اپنے مطالبے کے باوجود اعلامیے میں پاکستان کی مذمت شامل نہ کروا سکا اور آخرکار مشترکہ اعلامیے پر دستخط سے انکار کر دیا۔ ذرائع کے مطابق بھارتی وفد نے اعلامیے میں پاکستان کی مذمت شامل کروانے کیلئے دیگر رکن ممالک سے درخواستیں کیں، لیکن کسی بھی ملک نے بھارتی مؤقف کی حمایت نہ کی۔ اجلاس چین کے شہر چنگ ڈاؤ میں منعقد ہوا، جس میں ایران، روس، بیلاروس، پاکستان اور دیگر ممالک کے وزرائے دفاع شریک ہوئے۔ پاکستان کی نمائندگی وزیر دفاع خواجہ آصف نے کی جبکہ بھارت کی نمائندگی راج ناتھ سنگھ نے کی، تاہم دونوں کے درمیان کوئی دو طرفہ ملاقات نہیں ہوئی۔

یہ اجلاس اس وقت منعقد ہوا جب دنیا بھر میں جغرافیائی اور سکیورٹی تبدیلیاں تیزی سے وقوع پذیر ہو رہی ہیں۔ چینی وزیر دفاع ڈونگ جون نے اجلاس سے خطاب کرتے ہوئے یکطرفہ پالیسیوں، تحفظ پسندی اور عالمی نظام کو درپیش خطرات کا ذکر کیا اور رکن ممالک پر زور دیا کہ وہ پرامن ترقی کے ماحول کی مشترکہ حفاظت کے لیے مزید مؤثر اقدامات کریں۔ روسی وزیر دفاع اندری بلیوسوف نے بھی اس موقع پر چین کے ساتھ اپنے تعلقات کو تاریخی قرار دیتے ہوئے ہر میدان میں تعاون کی توثیق کی۔ اجلاس میں عالمی کشیدگی، بالخصوص مشرق وسطیٰ اور یوکرین روس جنگ کے تناظر میں ایس سی او کو ایک متوازن پلیٹ فارم کے طور پر پیش کیا گیا، جس کا مقصد مغرب کے زیر اثر عالمی بلاکس کے متبادل کے طور پر سیاسی، سیکیورٹی اور تجارتی تعاون کو فروغ دینا ہے