چیف جسٹس یحییٰ آفریدی نے پاکستان تحریک انصاف کو سسٹم میں رہنے اور بائیکاٹ سے گریز کا مشورہ دیا۔ میڈیا سے مختصر گفتگو کرتے ہوئے چئیرمین پی ٹی آئی بیرسٹر گوہر علی خان نے تصدیق کی کہ چیف جسٹس یحییٰ آفریدی کی جانب سے سسٹم میں رہنے اور بائیکاٹ سے گریز کا مشورہ دیا گیا ہے۔ گزشتہ روز پی ٹی آئی وفد نے چیف جسٹس یحییٰ آفریدی سے ملاقات کی، جس میں ہم نے اپنے شکوے اور شکایات ان کے سامنے رکھے۔

انہوں نے کہا کہ ملاقات میں چیف جسٹس کی تجاویز پر غور کیا گیا اور ہم نے اپنے مسائل بھی بیان کیے۔ حکومت کے خلاف ہماری چارج شیٹ بہت لمبی ہے، تاہم ہم عدلیہ سے بھی زیادہ خوش نہیں ہیں۔ چیف جسٹس پاکستان نے مسائل کے حل کی یقینی دہانی کرائی ہے۔ اس کے علاوہ، ہم اپوزیشن اور ہم خیال جماعتوں سے اتحاد بنانے کے لیے ملاقاتیں کر رہے ہیں۔ آج بھی پی ٹی آئی کا وفد کراچی میں جی ڈی اے سے ملے گا اور عید کے بعد پرامن سیاسی جدوجہد کا آغاز کریں گے۔ ہم نے کھلے دل کے ساتھ مذاکرات شروع کیے تھے اور چاہتے تھے کہ مذاکرات سے کوئی حل نکلے، مگر حکومت نے سنجیدگی سے نہیں لیا۔

اسی حوالے سے قومی اسمبلی میں اپوزیشن لیڈر اور پاکستان تحریک انصاف کے رہنما عمر ایوب کا کہنا ہے کہ چیف جسٹس آف پاکستان سے ملاقات کا مقصد انہیں ملکی حالات سے آگاہ کرنا تھا۔

وفاقی وزیر خزانہ محمد اورنگزیب نے کہا ہے کہ آئی ایم ایف نے یہ شرط رکھی ہے کہ وہ مزید مالی امداد دینے کے لیے تیار ہیں، لیکن اس کے لیے ٹیکس ریفارمز ضروری ہیں۔ فیصل آباد چیمبر آف کامرس کے اجلاس میں انہوں نے پالیسی ریٹ اور مہنگائی کے مسائل پر بات کی، اور کہا کہ ہمیں حالیہ عرصے میں ان معاملات میں مشکلات کا سامنا رہا ہے۔ شرح سود میں کمی آ رہی ہے، خاص طور پر آٹو فنانسنگ میں، اور ہم نے دیکھا ہے کہ چینی، گھی اور دیگر اشیاء کی قیمتوں میں بھی کمی آئی ہے۔ ہر سال چینی کی قیمتوں پر بات ہوتی ہے، اور وزیر خوراک نے کہا ہے کہ رمضان المبارک میں چینی کی قیمتیں کم ہوں گی۔ یہ سب چیزیں اس وقت مہنگی ہوتی ہیں جب مڈل مین شامل ہوتا ہے۔

وزیر خزانہ محمد اورنگزیب نے مزید کہا کہ بار بار یہ سوال اٹھتا ہے کہ ہم آئی ایم ایف کے پاس کیوں جاتے ہیں؟ اس کی وجہ یہ ہے کہ ہمیں اپنی معیشت کو چلانے کے لیے ان کی مدد کی ضرورت ہے۔ آئی ایم ایف نے کہا ہے کہ وہ مزید مالی امداد دینے کے لیے تیار ہیں، لیکن اس کے لیے ہمیں ٹیکس ریفارمز کرنی ہوں گی۔ ہم جو اصلاحات لا رہے ہیں، ان پر وزیراعظم مکمل طور پر متفق ہیں۔ تنخواہ دار طبقے پر بہت بوجھ پڑا ہے، اور ہم چاہتے ہیں کہ سیلری پرسن کو اپنا فارم جمع کروانا ہوگا۔ سات شعبہ جات سے منسلک تنخواہ دار طبقہ نومبر تک آن لائن اپنا فارم جمع کروا سکے گا، اور ہم اس پورے سسٹم کی ڈیجیٹلائزیشن کر رہے ہیں۔ آپ آنے والے دنوں میں مزید بہتری دیکھیں گے۔