news
مولانا فضل الرحمان: ملک میں سویلین اتھارٹی موجود نہیں
سربراہ جے یوآئی ف مولانا فضل الرحمان نے کہا ہے کہ اسٹیبلشمنٹ بند کمروں میں جو چاہے فیصلہ کرتی ہے اور حکومت کو انگوٹھا لگانا پڑتا ہے۔ حقیقت یہ ہے کہ ملک میں کوئی سیاسی سویلین اتھارٹی موجود نہیں۔ خیبرپختونخواہ اور بلوچستان کی صورتحال کسی سے پوشیدہ نہیں، حکمران ملکی معاملات سے بے خبر ہیں، اور کل کو ذمہ دار حکومت اور اپوزیشن دونوں ہوں گے۔
انہوں نے قومی اسمبلی میں اظہار خیال کرتے ہوئے کہا کہ ملک میں عام آدمی کے پاس نہ روزگار ہے اور نہ جان و مال کا تحفظ۔ یہاں محکموں کے محکمے ملیامیٹ کیے جا رہے ہیں، جس کی وجہ سے ہزاروں لوگ بے روزگار ہو رہے ہیں۔ اس کا فکر کس نے کرنا ہے؟ اگر حکومت عوام اور معیشت کے خلاف کوئی غلط فیصلہ کرتی ہے، تو قومی اسمبلی کو اس پر بات کرنی چاہیے۔ ایوان میں اپوزیشن کو ضد اور ہٹ دھرمی کا مظاہرہ کرنا چاہیے، لیکن ایک سال سے حکومت ہٹ دھرمی اور ضد کا مظاہرہ کر رہی ہے۔ مسئلہ ملک کی سالمیت کا ہے، اور اس حوالے سے پالیسی ایوانوں اور حکومتی حلقوں میں نہیں بلکہ ماورائے حکومت، سیاست اور پارلیمان بند کمروں میں بنائی جا رہی ہیں۔ ہمیں ایک لمحے کے لیے بھی ریاست کی بقاء پر بات کرنے کی اجازت نہیں ہے۔
انہوں نے مزید کہا کہ خیبرپختونخواہ اور بلوچستان کی صورتحال کسی سے پوشیدہ نہیں ہے، ہم وہاں مسلح گروہوں کے خلاف جنگ لڑ رہے ہیں۔
وفاقی وزیر رانا تنویر حسین نے واضح کیا ہے کہ یوٹیلیٹی سٹورز کو بند نہیں کیا جائے گا، بلکہ نجی شعبے کے تعاون سے ان کی بہتری کی کوشش کی جائے گی۔ حکومت نے ایوان بالا میں پالیسی بیان دیتے ہوئے کہا کہ یوٹیلیٹی سٹورز کی بندش کا کوئی ارادہ نہیں، بلکہ نظام کو بہتر بنا کر ان کی نجکاری کی جائے گی۔ ایوان میں یوٹیلیٹی سٹورز کی بندش کے حوالے سے سوال کا جواب دیتے ہوئے وزیر صنعت و پیداوار رانا تنویر حسین نے بتایا کہ ہم یوٹیلیٹی سٹورز کو بند نہیں کریں گے، بلکہ ان کی نجکاری کے لیے اصلاحاتی عمل جاری ہے۔
ہر سال یوٹیلیٹی سٹورز کو 50 ارب روپے کی سبسڈی دی جاتی ہے۔ پچھلے سال رمضان پیکج کے تحت ان کو 17 ارب روپے کی سبسڈی ملی تھی۔ اس سال حکومت نے رمضان پیکج کے لیے 20 ارب روپے کی سبسڈی مختص کی ہے۔ انہوں نے کہا کہ پہلی بار 40 لاکھ افراد کو رمضان پیکج کے تحت نقد امداد فراہم کی جائے گی۔
وفاقی وزیر نے مزید کہا کہ صرف غیر منافع بخش سٹورز بند کیے جائیں گے۔
مستقل اور کنٹریکٹ ملازمین کے حقوق کا تحفظ یقینی بنایا جائے گا۔ رانا تنویر حسین نے یہ بھی کہا کہ یوٹیلیٹی سٹورز کے ذریعے رمضان پیکج کے تجربات کامیاب نہیں رہے، کیونکہ غریب لوگوں کو معیاری اشیاء فراہم نہیں کی جا سکیں۔ سینیٹ اجلاس میں پیپلز پارٹی کے سینیٹرز شہادت اعوان اور شیری رحمٰن نے سرکاری ملازمین کے دو روز سے جاری احتجاج کا معاملہ اٹھایا۔
قومی اسمبلی میں اپوزیشن لیڈر اور پی ٹی آئی رہنما عمر ایوب نے کہا ہے کہ ملاقات کے دوران چیف جسٹس کو بتایا گیا کہ ہم 26 ویں آئینی ترمیم کو تسلیم نہیں کرتے۔ انہوں نے کہا کہ 26 ویں ترمیم کا متن اور طریقہ کار غلط تھا۔ عدالتی حکم کے باوجود بانی پی ٹی آئی سے ملاقات کا وقت تبدیل ہو جاتا ہے۔ اپوزیشن لیڈر نے سلمان اکرم راجا اور دیگر رہنماﺅں کے ہمراہ پریس کانفرنس کرتے ہوئے کہا کہ ہم نے چیف جسٹس سے ملاقات میں 9 مئی اور 26 نومبر کے معاملے پر بانی پی ٹی آئی عمران خان کے خطوط کا ذکر کیا۔
چیف جسٹس کے سامنے سینیٹرز اور ممبران اسمبلی کے پروڈکشن آرڈر کا معاملہ بھی پیش کیا گیا۔ ہم نے وکلا کو ڈرانے سے متعلق تفصیلات بھی چیف جسٹس کو بتائیں اور وکلا پر فیک ایف آئی آرز کا ذکر کیا۔
گزشتہ جیل ٹرائل میں بانی پی ٹی آئی سے چیف جسٹس سے ملاقات کی اجازت لی گئی تھی۔ ہم بانی کی اجازت کے بعد ملاقات کے لیے آئے۔ بانی نے کہا تھا کہ ملٹری کورٹ کے حوالے سے بھی بات کرنی ہے۔
چیف جسٹس پاکستان کو انصاف کی فراہمی میں حائل مسائل سے آگاہ کیا گیا۔ ملاقات کے دوران پولیس گردی اور ریاستی جبر کا معاملہ بھی اٹھایا گیا۔ سرگودھا انسداد دہشتگردی عدالت کا معاملہ بھی چیف جسٹس کے سامنے رکھا گیا۔ انہوں نے کہا کہ چیف جسٹس سے ایک طویل میٹنگ ہوئی ہے، جس میں ہمارے ہر رکن نے اپنی بات رکھی۔
سیاست8 years agoنواز شریف منتخب ہوکر دگنی خدمت کریں گے، شہباز کا بلاول کو جواب
- انٹرٹینمنٹ8 years ago
راحت فتح علی خان کی اہلیہ ان کی پروموشن کے معاملات دیکھیں گی
- کھیل8 years ago
پاکستانی کرکٹ ٹیم کے سابق کپتان شاہد آفریدی نے ساتھی کھلاڑی شعیب ملک کی نئی شادی پر ان کیلئے نیک خواہشات کا اظہار کیا۔
- انٹرٹینمنٹ8 years ago
شعیب ملک اور ثنا جاوید کی شادی سے متعلق سوال پر بشریٰ انصاری بھڑک اٹھیں
