پاک فوج اور ایس سی او نے ضلع شگر کے دور دراز علاقے ’’الچوڑی‘‘ میں آئی ٹی فری لانسنگ ہب قائم کر دیا ہے۔

اس پسماندہ علاقے میں آئی ٹی ہب کا قیام مقامی لوگوں کے لیے آئی ٹی انقلاب کے ذریعے ترقی کی ایک نئی راہ ہموار کرے گا۔

آئی ٹی ہب کے قیام کے یہ اقدامات SCO کے ویژن 2025 کا حصہ ہیں، جس کا مقصد آزاد کشمیر اور گلگت بلتستان میں ڈیجیٹل انقلاب لانا ہے۔

اس ویژن کے تحت گلگت بلتستان اور آزاد کشمیر کے دور دراز علاقوں میں انٹرنیٹ کی کنیکٹیوٹی فراہم کرنے کے بڑے منصوبے پر کام جاری ہے، اور اب تک 68 چھوٹے اور بڑے آئی ٹی سینٹرز قائم کیے جا چکے ہیں۔

ویژن کے تحت ان دور دراز علاقوں میں فری لانسنگ آئی ٹی ہب قائم کیے جا رہے ہیں، جہاں نوجوان نسل کو آن لائن روزگار کے مواقع مل رہے ہیں۔ الچوڑی جیسے دور دراز علاقے میں تیز ترین انٹرنیٹ کے ساتھ فری لانسنگ آئی ٹی ہب کا قیام ایک اہم سنگ میل ہے، اور نوجوان اس سہولت سے فائدہ اٹھا کر اپنے اور اپنے خاندان کے لیے روزگار کے مواقع پیدا کر سکتے ہیں۔

اس موقع پر علاقہ عمائدین، سول ایڈمنسٹریشن کے حکام اور الچوڑی ضلع شگر کے نوجوانوں نے دور دراز علاقے میں فری لانسنگ آئی ٹی ہب کے قیام پر پاک فوج اور ایس سی او کا شکریہ ادا کیا۔

حکومت نے پیکا ایکٹ کے حوالے سے صحافیوں کے خدشات دور کرنے کے لیے ایک ذیلی کمیٹی بنانے کا فیصلہ کیا ہے۔ تفصیلات کے مطابق قومی اسمبلی کی قائمہ کمیٹی برائے اطلاعات و نشریات کا اجلاس ہوا، جس میں یہ فیصلہ کیا گیا کہ صحافیوں کے خدشات کو دور کرنے کے لیے ذیلی کمیٹی تشکیل دی جائے گی۔ چئیرمین کمیٹی پولین بلوچ نے کہا کہ حکومت صحافیوں کے ساتھ بیٹھ کر ان کے خدشات سنے گی اور ان کا حل تلاش کیا جائے گا۔

متحدہ قومی موومنٹ کے رکن کمیٹی امین الحق نے اجلاس میں کہا کہ فیک نیوز ایک حقیقت ہے اور صحافی بھی اس کے خلاف ہیں، تاہم اس قانون پر صحافیوں کو شامل کر کے بات چیت کی جائے۔ سابق وزیر اطلاعات فواد چوہدری نے بھی پاکستان میڈیا ڈویلپمنٹ اتھارٹی کے قیام کی کوشش کی تھی۔

اس پر وفاقی وزیراطلاعات عطا اللہ تارڑ نے وضاحت کی کہ پیکا ایکٹ صرف ڈیجیٹل میڈیا کو ریگولیٹ کرنے کے لیے ہے۔ انہوں نے کہا کہ مثال کے طور پر جب سوشل میڈیا پر قاضی فائز عیسیٰ کے خلاف سنگین دھمکیاں دی گئیں، لیکن ان پر کوئی کارروائی نہیں ہوئی، اسی لیے یہ ایکٹ متعارف کرایا گیا۔ انہوں نے مزید کہا کہ اس ایکٹ سے اخبارات یا ٹی وی چینلز متاثر نہیں ہوں گے کیونکہ وہ پہلے ہی قواعد و ضوابط کے تحت کام کر رہے ہیں۔ اس ایکٹ کے نتیجے میں روایتی میڈیا کی مانگ میں اضافہ ہوگا اور ڈیجیٹل میڈیا پر کروڑوں کمانے والے افراد کو بھی ملکی قوانین کے تحت کچھ دینا ہوگا۔