اسلام آباد:
عالمی بینک کی جانب سے پاکستان کے داسو ہائیڈرو پاور منصوبے کے لیے ایک ارب ڈالر کے نئے قرض کی منظوری کا امکان ہے۔

ذرائع کے مطابق، داسو ہائیڈرو پاور منصوبے کی لاگت میں 190.1 فیصد کا اضافہ ہوا ہے، جو کہ 1700 ارب روپے تک پہنچ گئی ہے۔ اس کی وجوہات میں زمین کے حصول میں تاخیر، سکیورٹی خدشات، اور امریکی ڈالر کی قدر میں 178 فیصد کا اضافہ شامل ہیں۔

داسو ہائیڈرو پاور منصوبے کا پہلا مرحلہ 2,160 میگاواٹ بجلی پیدا کرے گا، جبکہ دوسرے مرحلے کے بعد منصوبے کی مجموعی پیداوار 4,320 میگاواٹ تک پہنچ جائے گی۔ یہ بات بھی قابل ذکر ہے کہ عالمی بینک پہلے ہی 588 ملین ڈالر کا قرض اور 460 ملین ڈالر کی گارنٹی فراہم کر چکا ہے۔

ذرائع کا کہنا ہے کہ 800 ملین ڈالر بین الاقوامی ترقیاتی ایسوسی ایشن اور 200 ملین ڈالر بین الاقوامی بحالی و ترقیاتی بینک کے تحت فراہم کیے جائیں گے۔ بین الاقوامی ترقیاتی ایسوسی ایشن کے تحت 435 ملین ڈالر صفر سود پر اور 365 ملین ڈالر 5.83 فیصد شرح سود پر دیے جائیں گے۔

اسی طرح، بین الاقوامی بحالی و ترقیاتی بینک کے تحت 200 ملین ڈالر 6.13 فیصد شرح سود پر فراہم کیے جائیں گے۔ منصوبے کی تکمیل پہلے 2023-24 میں متوقع تھی، لیکن اب یہ 2027-28 میں مکمل ہوگا۔

کراچی:
پاکستان اسٹاک ایکسچینج میں مندی کا رجحان جاری ہے، جبکہ انڈیکس ایک لاکھ 13 ہزار پوائنٹس سے اوپر ٹریڈ کر رہا ہے۔

کاروباری ہفتے کے پہلے دن مارکیٹ میں 287 پوائنٹس کی کمی کے ساتھ کاروبار کا آغاز ہوا، جس کے نتیجے میں کے ایس ای 100 انڈیکس 113968 پوائنٹس کی سطح پر آ گیا۔

پاکستان اسٹاک ایکسچینج میں مسلسل تیسرے دن مندی، سرمایہ کاروں کے مزید 31 ارب روپے ڈوب گئے

بعد میں بازارِ حصص میں مندی کا سلسلہ جاری رہا اور 640 پوائنٹس کی کمی کے ساتھ 100 انڈیکس 113615 پوائنٹس کی سطح پر پہنچ گیا۔

یہ بات قابل ذکر ہے کہ گزشتہ ہفتے بھی پی ایس ایکس میں مندی کا رجحان دیکھا گیا تھا، جس کے نتیجے میں مسلسل تین دن کی مندی میں سرمایہ کاروں کے 31 ارب روپے ضائع ہو گئے تھے۔