لاہور الیکٹرک سپلائی کمپنی (لیسکو) نے گلوکار جواد احمد کی اہلیہ کے پارلر میں بجلی چوری کے الزام میں جرمانہ عائد کر دیا ہے۔ لیسکو نے جواد احمد کی اہلیہ کے پارلر کو 13 لاکھ روپے کا ڈیٹیکشن بل بھیج دیا ہے۔ لیسکو حکام کا کہنا ہے کہ جواد احمد کو 27 ماہ کی بجائے صرف 6 ماہ کا ڈیٹیکشن بل دیا گیا ہے، جبکہ میٹر ابھی تک غائب ہے اور ملنے پر بل کی رقم میں اضافہ کیا جائے گا۔ بل کی مجموعی رقم 13 لاکھ روپے بنی ہے۔

حکام نے کہا کہ اگر صارف کسی بھی فورم پر جائے تو ہم نے زیادتی نہیں کی۔ ہم نے تمام کارروائی کی تفصیلات اعلیٰ حکام کو بھیج دی ہیں۔ لیسکو حکام نے یہ بھی بتایا کہ نواب ٹاؤن تھانے میں جواد احمد کے خلاف بجلی چوری کے الزام میں ایف آئی آر درج کی گئی ہے، لیکن وہ اس سے مطمئن نہیں ہیں۔ پولیس نے ایف آئی آر میں تمام دفعات شامل نہ کر کے بڑی زیادتی کی ہے۔

جواد احمد کی اہلیہ کے بیوٹی پارلر میں بجلی چوری پکڑی گئی تھی۔

لیسکو حکام کے چھاپے کی اطلاع ملتے ہی جواد احمد فوراً وہاں پہنچے اور ان کی لیسکو حکام سے تلخ کلامی بھی ہوئی۔ یاد رہے کہ دو روز قبل صوبائی دارالحکومت لاہور میں گلوکار جواد احمد کی اہلیہ کے بیوٹی پارلر میں بجلی کی چوری پکڑی گئی تھی۔ بتایا گیا کہ لیسکو عملے نے چیکنگ کے دوران پارلر کا دورہ کیا تھا، جس کے دوران گلوکار جواد احمد بھی وہاں پہنچ گئے تھے۔ انہوں نے ملازمین سے زبردستی میٹر چھین لیا تھا اور میٹر ریڈر کو بھی دھمکایا۔