پاکستانی معیشت میں استحکام کے بعد غیر ملکی سرمایہ کاروں نے اپنے ممالک کو بڑے پیمانے پر منافع واپس منتقل کیا ہے۔ نومبر 2023 کے مقابلے نومبر 2024 میں منافع کی واپسی میں 586 فیصد کا ریکارڈ اضافہ ہوا ہے۔

نومبر 2024 کے دوران غیر ملکی سرمایہ کاروں نے 32 کروڑ 16 لاکھ امریکی ڈالر کا منافع واپس بھیجا، جب کہ نومبر 2023 میں یہ رقم صرف 4 کروڑ 69 لاکھ ڈالر تھی۔

مالی سال 2025 کے اعداد و شمار

مالی سال 2025 کے ابتدائی 5 ماہ میں غیر ملکی سرمایہ کار مجموعی طور پر 1 ارب 12 کروڑ 88 لاکھ ڈالر کا منافع واپس لے گئے، جس میں 112 فیصد کا سالانہ اضافہ ریکارڈ کیا گیا۔

پابندیوں کے خاتمے کا کردار

ماہرین کا کہنا ہے کہ گزشتہ مالی سال زرمبادلہ کے ذخائر میں کمی کے باعث ڈالر کی بیرون ملک منتقلی پر پابندیاں عائد تھیں۔ تاہم، ذخائر میں بہتری کے بعد اسٹیٹ بینک نے یہ پابندیاں ختم کر دی ہیں، جس سے سرمایہ کاروں کی منافع کی واپسی میں نمایاں اضافہ ہوا ہے۔

کراچی: پاکستان اسٹاک مارکیٹ میں ریکارڈ توڑ مندی دیکھنے میں آئی، جہاں جمعرات کے روز پورا دن شدید گراوٹ کا رجحان غالب رہا۔

تفصیلات کے مطابق آج اسٹاک مارکیٹ سے 5 ہزار سے زائد پوائنٹس نکل گئے، کاروبار کا اختتام 4,795 پوائنٹس کی کمی کے ساتھ 1,06,274 پوائنٹس پر ہوا۔ مارکیٹ میں دن بھر 4.32 فیصد کمی دیکھی گئی، جب کہ سب سے کم ترین سطح 1,05,937 پوائنٹس پر ریکارڈ کی گئی۔

آج کے روز 56 ارب روپے کے 1 ارب 16 کروڑ حصص کا کاروبار ہوا۔ اسٹاک مارکیٹ میں 472 کمپنیوں کے حصص میں کاروبار ہوا، جن میں سے 66 کمپنیوں کے حصص کی قیمت میں اضافہ، جبکہ 371 کمپنیوں کے حصص کی قیمت میں کمی ہوئی۔

ماہرین کا کہنا ہے کہ مارکیٹ میں مسلسل اضافے کے بعد کریکشن کی توقع کی جا رہی تھی، جبکہ میوچل فنڈز کی جانب سے زبردست سیلنگ پریشر کے باعث یہ ریکارڈ ساز گراوٹ دیکھنے میں آئی۔

گزشتہ روز بھی اسٹاک مارکیٹ میں ملکی تاریخ کی سب سے بڑی مندی ریکارڈ کی گئی تھی، جب 100 انڈیکس میں 3,842 پوائنٹس کی کمی ہوئی تھی۔ یاد رہے کہ اس سے پہلے 26 نومبر کو 3,505 پوائنٹس کی کمی اسٹاک مارکیٹ کی تاریخ کی سب سے بڑی مندی تھی۔

ماہرین کے مطابق مارکیٹ میں موجودہ حالات سرمایہ کاروں کے لیے باعث تشویش ہیں، اور مزید سیلنگ پریشر کی توقع کی جا رہی ہے۔