وفاقی ادارہ شماریات نے مہنگائی سے متعلق اپنی ماہانہ رپورٹ جاری کردی ہے۔

ادارہ شماریات کے مطابق نومبر 2024 میں مہنگائی کی سالانہ شرح 4.9 فیصد ریکارڈ کی گئی تھی جب کہ اکتوبر 2024 میں یہ 7.2 فیصد یعنی تقریبا دگنی تھی ۔

نومبر 2024 کے دوران ماہانہ بنیاد پر سی پی آئی میں 0.5 فیصد کا اضافہ ہوا جب کہ اکتوبر میں 1.2 فیصد اور نومبر 2023 میں 2.7 فیصد کا اضافہ ریکارڈ کیا گیا ۔

ٹاپ لائن سیکیورٹیز نے اپنے ایک نوٹ میں کہا ہے کہ یہ 78 مہینوں میں سب سے کم شرح مہنگائی ہے۔ اکتوبر 2024 میں مہنگائی کی یہ شرح 7.2 فیصد تھی۔

نومبر میں مہنگائی کی شرح سرکاری توقعات سے بھی بہت کم رہی۔

وزارت خزانہ نے بدھ کو جاری کیے گیے اپنے ماہانہ آؤٹ لک میں کہا کہ انہیں نومبر میں مہنگائی 5.8 سے 6.8 فیصد کے درمیان رہنے کی بڑی توقع ہے اور دسمبر تک مزید کم ہوکر 5.6 سے 6.5 فیصد کے درمیان تک پہنچ جائےگی۔

پاکستان میں مہنگائی خاص طور پر حالیہ برسوں میں ایک اہم اور مستقل معاشی چیلنج بن گئی ہے۔ گزشتہ سال مئی میں سی پی آئی افراط زر کی شرح 38 فیصد کی ریکارڈ شدہ بلند ترین سطح پر پہنچ گئی تھی۔ البتہ اس کے بعد سے یہ نیچے کی طرف گامزن ہے۔

مہنگائی میں کمی سے کلیدی پالیسی ریٹ میں مزید کٹوتی کو بھی پزیرائی ملتی ہے۔
نومبر میں منعقد ہونے والی اپنی آخری ایم پی سی میں اسٹیٹ بینک نے پالیسی ریٹ میں 250 بنیادی پوائنٹس (بی پی ایس) کی تاریخی کٹوتی کا اعلان کیا تھا جس سے اہم شرح 15 فیصد تک پہنچ گئی تھی، یہ فیصلہ بہتر معاشی اشاریوں اور توقع سے زیادہ تیزی سے کم ہونے والی مہنگائی کے باعث کیا گیا تاکہ معاشی استحکام کو فروغ حاصل ہو سکے۔