بالی وڈ کی معروف اداکارہ کریتی سینن کا نیا گانا ‘انکھیا دے کول‘ فلم “دو پتی” کے لیے ریلیز کیا گیا، لیکن مداحوں نے اسے سن کر شدید ناراضگی کا اظہار کیا۔ یہ گانا ٹی سیریز کے پلیٹ فارم سے پیش کیا گیا، جو پاکستانی لوک گلوکارہ ریشماں کے مشہور گانے ‘اکھیاں نو رین دے’ کا ری میک ہے۔ مداحوں کا کہنا تھا کہ اس خوبصورت کلاسک گانے کا ری میک بنا کر اس کی اصل روح اور خوبصورتی کو نقصان پہنچایا گیا ہے۔ ایک صارف نے لکھا، “یہ گانا مکمل طور پر تباہ کر دیا گیا ہے”، جبکہ ایک اور نے کہا، “ایک اور کلاسک گانا ری میک کی بھینٹ چڑھ گیا۔”

ریشماں، جو پاکستان سے تعلق رکھنے والی ایک مشہور لوک فنکارہ تھیں، کا تعلق راجھستان کے خانہ بدوش خاندان سے تھا۔ وہ موسیقی کی باضابطہ تعلیم کے بغیر سندھ اور پنجاب کے مزارات پر صوفیانہ کلام گاتی تھیں۔ ان کی آواز اور گائیکی کو پہلی بار ریڈیو پروڈیوسر سلیم گیلانی نے دریافت کیا جب وہ حضرت لعل شہباز قلندر کے مزار پر گارہی تھیں۔ ان کا گایا ہوا مشہور گانا ‘لعل میری’ نے انہیں شہرت کی بلندیوں پر پہنچا دیا۔

ریشماں کے کئی اور گانے بھی بے حد مقبول ہوئے، جن میں ‘وے میں چوری چوری’، ‘دما دم مست قلندر’، اور ‘اکھیاں نو رین دے’ شامل ہیں۔ ان کے گانے ‘لمبی جدائی’، جو 1983 میں ریلیز ہونے والی بالی وڈ فلم “ہیرو” کا حصہ تھا، نے انہیں راتوں رات سپر اسٹار بنا دیا اور یہ گانا آج بھی بے حد پسند کیا جاتا ہے۔

فلم “دو پتی” کا گانا ‘انکھیا دے کول’ حال ہی میں ریلیز ہوا اور سننے والوں نے فوراً پہچان لیا کہ یہ ریشماں کے گانے کا ری میک ہے۔ اس گانے کو آئٹم سانگ کے طور پر کریتی سینن پر فلمایا گیا ہے، جس میں ان کے رقص کے مناظر نمایاں ہیں۔ تاہم، ٹی سیریز نے اس گانے کے حقیقی کریڈٹ ریشماں کو دیا ہے اور تفصیلات میں انہیں گانے کی اصل گلوکارہ بتایا ہے۔

فلم “دو پتی” 25 اکتوبر کو ریلیز ہوگی، جس میں کریتی سینن اور کاجول اہم کرداروں میں نظر آئیں گی۔ کریتی فلم میں ڈبل رول نبھائیں گی جبکہ کاجول ایک پولیس افسر کے کردار میں جلوہ گر ہوں گی، جو فلم میں سسپنس اور ڈرامہ بڑھا رہی ہیں۔