گوجرانوالہ کی انسداد دہشت گردی عدالت نے بانی پی ٹی آئی عمران خان پر حملے میں ملوث مرکزی ملزم نوید کو دو بار عمر قید کی سزا سنادی۔ عدالت نے مرکزی ملزم کو دو مختلف دفعات کے تحت عمر قید اور پانچ لاکھ روپے جرمانے کی سزا سنائی۔ گوجرانوالہ ڈسٹرکٹ کورٹ میں عمران خان پر قاتلانہ حملے کے مقدمے کی سماعت کے دوران اے ٹی سی عدالت نے حملے میں معظم کے قتل اور دہشت گردی کی دفعات کے تحت الگ الگ عمر قید کی سزائیں سنائیں۔

عدالت نے اپنے فیصلے میں کہا کہ چار افراد کو زخمی کرنے کے جرم میں بھی ملزم نوید کو تین سے پانچ سال قید کی سزائیں بھگتنا ہوں گی۔ دوسری جانب شریک ملزمان طیب جہانگیر بٹ اور وقاص کو عدالت نے بری کردیا۔ فیصلے میں واضح کیا گیا کہ فائرنگ سے جاں بحق ہونے والے معظم نواز کے قتل کے جرم میں نوید کو ایک بار عمر قید اور دہشت گردی ایکٹ کے تحت جرم ثابت ہونے پر دوبارہ عمر قید کی سزا دی گئی ہے۔

عدالت نے مجرم نوید پر پانچ لاکھ روپے کا جرمانہ بھی عائد کیا۔ فائرنگ کے نتیجے میں زخمی ہونے والے بانی پی ٹی آئی اور دیگر افراد کے الزامات کے تحت ملزم کو قید کی سزائیں سنائی گئیں۔ مقدمے میں بانی پی ٹی آئی کا حق صفائی ختم کردیا گیا تھا، کیونکہ مقدمے کے زخمی گواہان کی پیروی پر حق صفائی کو ختم کرنے کا فیصلہ کیا گیا۔

یاد رہے کہ 3 نومبر 2022 کو وزیرآباد کے اللہ والا چوک پر تحریک انصاف کے لانگ مارچ کے دوران عمران خان کے کنٹینر پر اچانک فائرنگ کی گئی تھی، جس کے نتیجے میں عمران خان سمیت متعدد افراد زخمی اور ایک شخص معظم نواز جاں بحق ہوگیا تھا۔ پولیس نے واقعے کے بعد ملزم نوید کو جائے وقوعہ سے گرفتار کرلیا تھا اور تمام پہلوؤں سے تفتیش کا آغاز کیا تھا۔ واقعے کی ایف آئی آر 7 نومبر کو درج کی گئی تھی اور انسداد دہشت گردی ایکٹ 1997 کے تحت 3 نومبر کو ایک مشترکہ تحقیقاتی ٹیم (جے آئی ٹی) تشکیل دی گئی تھی۔ مقدمہ پولیس کی مدعیت میں درج کیا گیا تھا۔

اسپیس ایکس نے کیپ کینویرل اسپیس فورس اسٹیشن سے 28 سیٹلائٹس کے ساتھ فیلکن 9 راکٹ کامیابی سے لانچ کر دیا ہے۔ میڈیا رپورٹس کے مطابق فیلکن 9 راکٹ ان 28 اسٹارلنک سیٹلائٹس کو کم زمین کے مدار میں تعینات کرے گا، جس کا مقصد کمپنی کے انٹرنیٹ سیٹلائٹ نیٹ ورک کو مزید وسعت دینا ہے۔ یہ اسپیس ایکس کا 464 واں فیلکن 9 راکٹ لانچ ہے جب سے کمپنی نے 2010 میں انٹرنیٹ سیٹلائٹس کو خلا میں بھیجنے کا آغاز کیا تھا۔

اسپیس ایکس کے مطابق یہ مشن اس مخصوص ایندھن بوسٹر راکٹ کا 23 واں استعمال تھا۔ بوسٹر راکٹ لانچ کے تقریباً 8.5 منٹ بعد بہاماس کے بحر اوقیانوس کے مشرق میں واقع ڈرون شپ “اے شارٹ فال آف گریویٹس” پر کامیابی سے واپس آ گیا۔ اس بار تعینات کیے جانے والے سیٹلائٹس پہلے تعینات کیے گئے سیٹلائٹس کے مقابلے میں کچھ ہلکے ہیں جبکہ اسپیس ایکس نے اگلی کھیپ کے لیے سیٹلائٹس کا ایک قدرے بڑا اور بھاری ورژن بھی تیار کر رکھا ہے۔