خیبر پختونخوا کے اضلاع باجوڑ اور خیبر میں دہشت گردوں کے خلاف کارروائی کا فیصلہ کیا گیا ہے۔ ذرائع کے مطابق باجوڑ میں شدت پسندوں کے ساتھ ہونے والا جرگہ ناکام ہوگیا، کیونکہ قبائلی عمائدین کے تین مطالبات میں سے اہم مطالبہ — علاقہ چھوڑنے — کو فتنہ الخوارج نے مسترد کر دیا۔

کمشنر ملاکنڈ عابد وزیر نے بتایا کہ متاثرین کے لیے رہائش کا انتظام مکمل کر لیا گیا ہے۔ خار میں 107 سرکاری عمارتوں میں لوگوں کو ٹھہرایا جائے گا جبکہ اسپورٹس کمپلیکس میں خیمہ بستی قائم کی جائے گی۔ ان کے مطابق نقل مکانی کرنے والے افراد کو تمام بنیادی سہولتیں فراہم کی جائیں گی۔

ذرائع کا کہنا ہے کہ باجوڑ کی تحصیل ماموند کے دو علاقوں میں تقریباً 300 دہشت گرد موجود ہیں، جبکہ تحصیل کی آبادی تین لاکھ سے زائد ہے۔ اب تک 40 ہزار سے زیادہ لوگ اپنا علاقہ چھوڑ چکے ہیں۔ خیبر میں بھی 350 سے زائد دہشت گرد موجود ہیں، جن میں سے 80 فیصد سے زیادہ کا تعلق افغانستان سے ہے۔