کراچی میں کاروباری ہفتے کے پہلے دن پاکستان اسٹاک ایکسچینج میں شاندار اور تاریخ ساز تیزی دیکھنے میں آئی، جس نے انڈیکس کو نئی بلند ترین سطح پر پہنچا دیا۔ پیر کے روز کاروبار کا آغاز 250 پوائنٹس کے اضافے سے ہوا، جس کے نتیجے میں کے ایس ای 100 انڈیکس 1,45,632 پوائنٹس پر پہنچ گیا۔ دن بھر تیزی کا رجحان غالب رہا اور کاروباری سیشن کے اختتام پر 1547 پوائنٹس کے بڑے اضافے کے ساتھ انڈیکس 1,46,929 پوائنٹس کی نئی بلند ترین سطح پر بند ہوا۔ گزشتہ ہفتے بھی بازارِ حصص میں مسلسل تیزی دیکھی گئی تھی اور ہر کاروباری دن انڈیکس نے بلندی کے نئے ریکارڈ قائم کیے تھے۔

پاکستانی اداکار فواد خان اور بھارتی اداکارہ وانی کپور کی مشترکہ فلم “آبیر گلال” 29 اگست 2025 کو دنیا بھر میں ریلیز کی جائے گی، تاہم بھارت میں اس کی نمائش نہیں ہوگی۔ فواد خان، جو ہمیشہ سے اپنے پروجیکٹس کے انتخاب میں محتاط رہے ہیں، ڈرامہ “ہمسفر” اور پاکستان کی سب سے زیادہ کمائی کرنے والی فلم “دی لیجنڈ آف مولا جٹ” سے شہرت حاصل کرچکے ہیں۔ وہ ماضی میں بالی ووڈ میں بھی جلوہ گر ہوئے تھے، لیکن فلم “اے دل ہے مشکل” کے بعد بھارتی حکومت کی جانب سے پاکستانی فنکاروں پر پابندی کے باعث ان کا فلمی سفر رک گیا۔ نو سال بعد وہ “آبیر گلال” کے ذریعے واپسی کر رہے ہیں، جو مئی میں پاک-بھارت کشیدگی کے باعث تاخیر کا شکار ہوئی تھی۔ اس دوران فواد خان پر بھارت کے خلاف خاموش رہنے پر تنقید بھی ہوئی اور وانی کپور نے ان کے ساتھ اپنی تمام تصاویر ڈیلیٹ کردی تھیں۔ اب فلم کا نام بدل کر “آبیر گلال” رکھ دیا گیا ہے اور فواد خان اس کی بین الاقوامی تشہیر میں مصروف ہیں۔