اسلام آباد:
ملک میں چینی کی قلت اور بڑھتی ہوئی قیمتوں پر قابو پانے کے لیے حکومت نے اہم فیصلہ کر لیا ہے۔ وفاقی وزیر برائے غذائی تحفظ و تحقیق رانا تنویر حسین کی زیر صدارت شوگر ایڈوائزری بورڈ کا اجلاس منعقد ہوا جس میں چینی کی صورتحال کا تفصیلی جائزہ لیا گیا۔ اجلاس میں فیصلہ کیا گیا کہ ملک میں چینی کی فراہمی کو بہتر بنانے اور قیمتوں کو مستحکم رکھنے کے لیے پانچ لاکھ ٹن چینی درآمد کی جائے گی۔

اجلاس کے دوران یہ انکشاف بھی سامنے آیا کہ شوگر مل مالکان کی من مانی اور منافع خوری چینی کی قیمتوں میں اضافے کی ایک بڑی وجہ ہے، جس پر قابو پانے کے لیے سخت مانیٹرنگ کا فیصلہ کیا گیا ہے۔

وفاقی وزیر رانا تنویر حسین نے اجلاس میں کہا کہ شوگر کی قیمتوں کو کنٹرول میں رکھنے کے لیے درآمد کا فیصلہ ناگزیر تھا کیونکہ ملک بھر میں چینی کی سپلائی میں نمایاں کمی دیکھی گئی ہے۔ انہوں نے یقین دلایا کہ درآمدی شوگر کی رسمی کارروائیاں آئندہ چند روز میں مکمل کر لی جائیں گی، جس کے بعد اسے فوری طور پر مارکیٹ میں لایا جائے گا تاکہ صارفین کو ریلیف فراہم کیا جا سکے۔

حکومت کے اس اقدام سے امید کی جا رہی ہے کہ شوگر کی قیمتوں میں استحکام آئے گا اور عوام کو بڑھتی مہنگائی سے کچھ ریلیف حاصل ہوگا۔

پنجابی فلم “سردار جی 3” کا آفیشل ٹریلر جاری کر دیا گیا ہے، جس میں پاکستانی اداکارہ ہانیہ عامر کی جھلک دیکھ کر مداح خوشی سے حیران رہ گئے۔ یوٹیوب پر وائٹ ہِل میوزک کے چینل سے جاری ہونے والے اس ٹریلر میں دلجیت دوسانجھ، نیرو باجوہ، ہانیہ عامر، ناصر چنیوٹی سمیت دیگر معروف فنکار جلوہ گر ہیں۔ فلم کی شوٹنگ برطانیہ میں مکمل کی گئی ہے۔ ہانیہ عامر کی فلم میں شمولیت پر پہلے خدشات کا اظہار کیا جا رہا تھا، کہا جا رہا تھا کہ ان کا کردار نکال دیا گیا ہے اور ان کے مناظر دوبارہ شوٹ کیے گئے ہیں، تاہم ٹریلر میں ان کے بھرپور مناظر دیکھ کر مداح خوشی سے جھوم اٹھے۔

سوشل میڈیا پر مداحوں نے ہانیہ کی موجودگی اور اداکاری کو سراہتے ہوئے کہا کہ انہوں نے ’میرے ہمسفر‘ سے لے کر اب بین الاقوامی پنجابی سنیما میں اپنی شناخت قائم کر لی ہے۔ ایک صارف نے طنزیہ انداز میں لکھا، “کہاں گئے وہ لوگ جو کہہ رہے تھے کہ ہانیہ فلم سے نکال دی گئی ہیں؟”

کامیڈی سے بھرپور “سردار جی 3” 27 جون کو مختلف ممالک میں ریلیز کی جائے گی۔ بعض رپورٹس کے مطابق، پاک بھارت کشیدگی کے باعث بھارتی سینما میں اس فلم کی نمائش نہیں کی جا رہی، کیونکہ بھارت میں ایک بار پھر پاکستانی فنکاروں کے ساتھ کام کرنے پر پابندی لگا دی گئی ہے۔ اس کے باوجود ہانیہ عامر ایک بھارتی پنجابی فلم میں جلوہ گر ہونے میں کامیاب ہو چکی ہیں، جو ان کے کیریئر کے لیے ایک بڑی کامیابی سمجھی جا رہی ہے۔