پاکستان تحریک انصاف کے چیئرمین بیرسٹر گوہر نے واضح کیا ہے کہ پارٹی اپنے بانی عمران خان کی رہائی کے لیے کسی بھی بیرونی ملک یا قوت سے مدد کی درخواست نہیں کرے گی۔ میڈیا سے گفتگو کرتے ہوئے انہوں نے کہا کہ پی ٹی آئی جمہوری، آئینی اور قانونی راستوں کو اختیار کرتے ہوئے عدالتوں سے ہی ریلیف حاصل کرنے کا فیصلہ کر چکی ہے۔

انہوں نے مزید کہا کہ عمران خان سے ملاقات کی اجازت نہ ملنے کی وجہ سے خیبرپختونخوا کا بجٹ تعطل کا شکار ہے کیونکہ پارٹی قائد کی مشاورت کے بغیر اہم فیصلے ممکن نہیں۔ بیرسٹر گوہر کے مطابق پارٹی کو موجودہ حالات میں شدید مشکلات کا سامنا ہے، لیکن بیرونی مداخلت پر انحصار نہیں کیا جائے گا۔

ادھر سینیٹ کے اجلاس میں وزراء کی عدم موجودگی پر پاکستان تحریک انصاف کے رہنماؤں نے واک آؤٹ کیا۔ سینیٹر شبلی فراز اور کامل علی آغا نے اس صورتحال پر احتجاج کرتے ہوئے حکومت کو تنبیہ کی کہ ایوان کا کورم اور وزراء کی موجودگی یقینی بنائی جائے۔ ڈپٹی چیئرمین سینیٹ سیدال خان ناصر نے وزراء کی عدم حاضری پر برہمی کا اظہار کیا اور فوری طور پر ایوان میں آنے کی ہدایت دی۔ بعدازاں حکومتی وزراء ایوان میں پہنچے اور وقار مہدی و کامل علی آغا اپوزیشن کو منا کر ایوان میں واپس لے آئے، تاہم شبلی فراز نے دوبارہ واک آؤٹ کرتے ہوئے حکومت کو کورم پورا کرنے کی ذمہ داری یاد دلائی۔

ایران نے واضح طور پر اعلان کیا ہے کہ جب تک اسرائیل کی جانب سے حملے جاری رہیں گے، تہران کسی بھی ملک یا فریق کے ساتھ مذاکرات کیلئے تیار نہیں ہوگا۔ ایرانی وزیر خارجہ عباس عراقچی نے سرکاری میڈیا سے گفتگو میں کہا کہ اسرائیل بین الاقوامی قوانین اور اقوام متحدہ کی قراردادوں کی کھلم کھلا خلاف ورزی کر رہا ہے، جبکہ مغربی ممالک اس جارحیت پر خاموش تماشائی بنے ہوئے ہیں۔

عباس عراقچی نے کہا کہ ایران شہری آبادی، بالخصوص ہسپتالوں کو کبھی نشانہ نہیں بناتا، لیکن اسرائیل جان بوجھ کر ایسے مقامات پر حملے کرتا ہے۔ ان کا کہنا تھا کہ ایران کے جواب کے بعد لگتا ہے کہ دیگر ممالک اس کشیدگی سے خود کو دور رکھنے میں ہی عافیت سمجھیں گے۔

یہ بیان ایسے وقت میں سامنے آیا ہے جب یورپی وزرائے خارجہ نے ایران کے ساتھ جوہری مذاکرات کیلئے جنیوا میں ملاقات کی تیاری کی تھی۔ ان مذاکرات میں برطانیہ، فرانس اور جرمنی کے وزرائے خارجہ کی شرکت متوقع تھی، جبکہ امریکی حمایت سے ایرانی وزیر خارجہ کی شرکت بھی طے پائی تھی۔

یورپی سفارتی ذرائع کا کہنا ہے کہ اگر ایران تعاون پر آمادہ ہو تو کشیدگی کم کرنے کا موقع پیدا ہو سکتا ہے۔ مذاکرات کا مقصد ایران سے یہ یقین دہانی لینا ہے کہ اس کا جوہری پروگرام پرامن مقاصد تک محدود رہے گا۔ مذاکرات کے بعد ماہرین کی سطح پر اسٹرکچرڈ ڈائیلاگ بھی ترتیب دیا گیا ہے، لیکن ایران کی حالیہ سخت پوزیشن سے یہ عمل تعطل کا شکار ہو سکتا ہے۔