آرمی چیف جنرل سید عاصم منیر نے کہا ہے کہ دو قومی نظریہ ہمیشہ سے پاکستان کے وجود کی بنیاد رہا ہے اور ہمیں اپنے ملک کا دفاع کرنا خوب آتا ہے۔ انہوں نے واضح کیا کہ دو قومی نظریے پر کسی پاکستانی کو رتی برابر بھی شک نہیں۔

پاکستان ملٹری اکیڈمی کاکول میں کیڈٹس کی پاسنگ آؤٹ تقریب سے خطاب کرتے ہوئے آرمی چیف نے کہا کہ بھارتی گودی میڈیا حقائق کو اپنے جھوٹ اور پروپیگنڈے سے چھپانے کی کوشش کر رہا ہے، لیکن وہ تاریخ کو مسخ نہیں کر سکتا۔

جنرل عاصم منیر نے کہا کہ دو قومی نظریے کی بنیاد یہ ہے کہ مسلمان اور ہندو دو علیحدہ قومیں ہیں، جن کے ضابطہ ہائے حیات، سماجی ڈھانچے اور اقدار مکمل طور پر مختلف ہیں۔ بانی پاکستان قائداعظم محمد علی جناح نے بھی بارہا اپنے تاریخی خطابات میں اس فرق کو واضح کیا تھا۔ انہوں نے کہا کہ مسلمانوں اور ہندوؤں کی مذہب، تہذیب، ثقافت، تاریخ اور طرزِ زندگی میں اتنا بنیادی فرق ہے کہ یہ خلیج کبھی ختم نہیں ہو سکتی۔

آرمی چیف نے کہا کہ ہمارے آباو اجداد نے پاکستان کے حصول کے لیے بے مثال قربانیاں دیں اور ہم نے اپنے وطن کے لیے بہت جدوجہد کی ہے۔ انہوں نے کہا کہ بھارتی میڈیا اور سوشل میڈیا اپنے جھوٹے پروپیگنڈے سے دو قومی نظریے کو جھٹلا نہیں سکتے، اور ہر جھوٹے پروپیگنڈے کی کوشش ناکام ہو گی۔

انہوں نے مزید کہا کہ دو قومی نظریہ ایک زندہ حقیقت ہے، جسے کوئی جھٹلایا نہیں جا سکتا۔ ہم اپنے وطن کا دفاع کرنا جانتے ہیں اور کسی بھی جارحیت کا منہ توڑ جواب دینے کی بھرپور صلاحیت رکھتے ہیں۔

دریں اثنا، پاکستان ملٹری اکیڈمی کاکول میں پاسنگ آؤٹ پریڈ کی پروقار تقریب منعقد ہوئی جس میں وزیر اعظم شہباز شریف مہمانِ خصوصی تھے، جبکہ آرمی چیف جنرل سید عاصم منیر مہمانِ اعزاز کے طور پر شریک ہوئے۔

تقریب میں وزیر دفاع خواجہ آصف، وزیر اطلاعات عطا اللہ تارڑ، غیر ملکی سفارتکار، اور اعلیٰ سول و عسکری حکام نے بھی شرکت کی۔ آرمی چیف جنرل عاصم منیر کو تقریب میں آمد پر سلامی دی گئی، اور وزیر اعظم شہباز شریف کی آمد پر بگل بجا کر اعلان کیا گیا اور انہیں بھی سلامی پیش کی گئی۔

وزیر اعظم شہباز شریف نے پاسنگ آؤٹ کی پریڈ کا معائنہ کیا اور گریجویٹ ہونے والے کیڈٹس کی حلف برداری میں شرکت کی۔ بہترین کارکردگی کا مظاہرہ کرنے والے کیڈٹس میں وزیراعظم نے انعامات تقسیم کیے۔

اعزازی شمشیر انڈر آفیسر محمد حنان ملک نے حاصل کی، صدارتی طلائی تمغہ انڈر آفیسر زین العابدین نے حاصل کیا جبکہ چیئرمین جوائنٹ چیفس آف اسٹاف کمیٹی اوورسیز گولڈ میڈل نیپال کے کیڈٹ کو دیا گیا۔ لیڈی کیڈٹ لائبہ رحمان کو بھی اعزاز سے نوازا گیا، اور انڈر آفیسر محمد طلحہ ایاز نے کمانڈنٹ اعزازی چھڑی حاصل کی۔

وزیراعظم شہباز شریف نے پاس آؤٹ ہونے والے کیڈٹس کو مبارکباد دیتے ہوئے کہا کہ پاسنگ آؤٹ پریڈ میں شرکت ان کے لیے باعث اعزاز ہے۔ انہوں نے کہا کہ ہماری مسلح افواج تنظیم، اتحاد اور قومی مفاد کی تکمیل اور عزم کی علامت ہیں۔

وزیر اعظم شہباز شریف نے کہا ہے کہ کسی کو بھی غلط فہمی میں مبتلا نہیں ہونا چاہیے، اگر بھارت نے پانی روکنے کی کوشش کی تو پاکستان پوری طاقت سے جواب دے گا۔ انہوں نے کہا کہ وطن عزیز کے ایک ایک انچ کا دفاع کیا جائے گا اور کسی بھی مس ایڈونچر کا منہ توڑ جواب دیا جائے گا۔

پاکستان ملٹری اکیڈمی کاکول میں کیڈٹس کی پاسنگ آؤٹ تقریب سے بطور مہمان خصوصی خطاب کرتے ہوئے وزیر اعظم شہباز شریف نے کہا کہ پاکستان دہشت گردی کے خلاف فرنٹ لائن ریاست ہے۔ پاکستان ایک ذمہ دار ریاست ہونے کے ناطے غیر جانبدارانہ عالمی تحقیقات کے لیے تیار ہے لیکن کسی قسم کی دھمکیاں ناقابلِ قبول ہیں۔

وزیر اعظم نے کہا کہ بھارت نے پہلگام واقعے کے بعد بے بنیاد اور بغیر ثبوت الزامات لگائے۔ پاکستان نے ہر شکل میں دہشت گردی کو مسترد کیا ہے اور اس کی ہمیشہ مذمت کی ہے۔ دنیا میں دہشت گردی سے سب سے زیادہ متاثر ہونے والا ملک پاکستان ہے جہاں 90 ہزار سے زائد شہریوں نے اپنی جانوں کا نذرانہ دیا، جبکہ پاکستان کی معیشت کو بھی اربوں ڈالر کا نقصان برداشت کرنا پڑا۔

انہوں نے مزید کہا کہ اگر سندھ طاس معاہدے کی خلاف ورزی کرتے ہوئے بھارت نے پاکستان کا پانی روکا تو بھرپور اور پوری قوت سے جواب دیا جائے گا۔ پاکستان کی مسلح افواج ہر قسم کی صورتحال سے نمٹنے کے لیے مکمل طور پر تیار ہیں۔ پاکستان اقوام متحدہ کی سلامتی کونسل کا غیر مستقل رکن ہونے کے ناطے دنیا بھر میں امن و سلامتی کا خواہاں ہے اور اپنی کوششیں جاری رکھے گا۔

وزیر اعظم شہباز شریف نے کہا کہ 25 کروڑ پاکستانی عوام متحد ہیں اور اپنی مسلح افواج کے شانہ بشانہ کھڑے ہیں۔ امن ہماری خواہش ہے لیکن اسے کمزوری نہ سمجھا جائے۔ افغانستان کے حوالے سے بات کرتے ہوئے انہوں نے کہا کہ افغانستان ہمارا برادر اسلامی ملک ہے اور ہماری خواہش ہے کہ ہم پرامن بقائے باہمی کی بنیاد پر تعلقات استوار رکھیں، لیکن بدقسمتی سے افغان سرزمین سے پاکستان میں دہشت گردی کی کارروائیاں ہو رہی ہیں۔

انہوں نے بتایا کہ حال ہی میں نائب وزیر اعظم اسحاق ڈار نے کابل کا دورہ کیا اور افغان حکام کو باور کروایا کہ پاکستان اچھے تعلقات کا خواہاں ہے، لیکن پاکستانی سرزمین پر حملے ناقابلِ برداشت ہیں۔

کشمیر کے حوالے سے شہباز شریف نے کہا کہ بانی پاکستان قائداعظم محمد علی جناح نے کشمیر کو پاکستان کی شہ رگ قرار دیا تھا۔ یہ ایک عالمی تنازع ہے جو کئی دہائیوں سے حل طلب ہے۔ کشمیریوں نے اپنی آزادی کے لیے لاکھوں جانوں کا نذرانہ پیش کیا ہے لیکن عالمی برادری مسئلہ کشمیر کے حل میں ناکام نظر آتی ہے۔

وزیر اعظم نے کیڈٹس سے خطاب کرتے ہوئے کہا کہ آج آپ دنیا کی بہترین افواج میں شامل ہو رہے ہیں، جس کا نظم و ضبط دنیا میں مثالی ہے۔ مسلح افواج بانی پاکستان کے رہنما اصولوں کے مطابق فرائض انجام دے رہی ہیں۔

انہوں نے کہا کہ پاکستان معیشتی میدان میں بحالی کے بعد بھرپور چیلنجز کے باوجود ترقی کی راہ پر گامزن ہے۔ ہم کان کنی، معدنیات، دفاعی پیداوار اور دیگر کئی شعبوں میں غیر ملکی سرمایہ کاری حاصل کر رہے ہیں۔