اسلام آباد:
پاکستان اور آئی ایم ایف کے درمیان پاکستان آئی ایم ایف اسٹاف لیول معاہدہ طے پا گیا ہے، جس کے تحت حکومتِ پاکستان کو عالمی مالیاتی ادارے سے 1.2 ارب ڈالرز بطور قرض فراہم کیے جائیں گے۔
یہ رقم ایکسٹینڈڈ فنڈ فسیلیٹی (EFF) کے تحت ایک ارب ڈالر اور ریزیلینس اینڈ سسٹین ایبلٹی فسیلیٹی (RSF) کے تحت 20 کروڑ ڈالر پر مشتمل ہوگی۔

آئی ایم ایف کی جانب سے جاری اعلامیے کے مطابق پاکستان نے سماجی و معاشی اصلاحات میں نمایاں کامیابیاں حاصل کی ہیں۔
اعلامیے میں کہا گیا کہ پاکستان نے بے نظیر انکم سپورٹ پروگرام کے فنڈز میں اضافہ کیا، جس سے غربت میں کمی لانے میں مدد ملی۔
پاکستان کا مالیاتی خسارہ گزشتہ 14 سال کی بہترین سطح پر پہنچ چکا ہے، جبکہ تعلیم، صحت اور مالیاتی نظم و ضبط میں وفاق اور صوبوں کی کارکردگی کو سراہا گیا۔

اعلامیے کے مطابق پاکستان نے ٹیکس اصلاحات کے نفاذ اور ریونیو میں اضافے کے لیے عملی اقدامات کیے ہیں۔
وفاق اور صوبوں کے درمیان تعاون بڑھانے، ٹیکس نیٹ پھیلانے اور محصولات کے نظام کو مضبوط بنانے کی ہدایت دی گئی۔

مزید کہا گیا ہے کہ پاکستان میں افراطِ زر کو 5 سے 7 فیصد کے دائرے میں رکھنے اور زرمبادلہ کے ذخائر مستحکم بنانے کیلئے اقدامات جاری ہیں۔
سٹیٹ بینک آف پاکستان مالیاتی پالیسی میں سختی برقرار رکھنے کے لیے پرعزم ہے۔

آئی ایم ایف نے اس بات پر زور دیا کہ حکومت کو سرکلر ڈیٹ میں کمی، بجلی کے نقصانات کم کرنے اور تقسیم کار کمپنیوں کی کارکردگی بہتر بنانے کے اہداف حاصل کرنا ہوں گے۔
ادارے نے زرعی پیداوار میں اضافے، نئی ٹیرف پالیسی اپنانے، ماحولیاتی تبدیلی سے نمٹنے اور توانائی اصلاحات کے تسلسل پر بھی زور دیا۔

وزیر خزانہ سینیٹر محمد اورنگزیب نے آئی ایم ایف کے ڈائریکٹر جہاد ازعور سے ملاقات کرکے پاکستان کے اصلاحاتی ایجنڈے پر عزم کا اعادہ کیا۔

وفاقی وزیر خزانہ نے امریکا کے سرکاری دورے کے پہلے دن واشنگٹن ڈی سی میں آئی ایم ایف اور ورلڈ بینک گروپ کے سالانہ اجلاسوں میں شرکت کی، جہاں متعدد اہم ملاقاتیں ہوئیں۔

وزارت خزانہ کے مطابق وزیر خزانہ اور ان کے وفد نے آئی ایم ایف کے مشرقِ وسطیٰ اور وسطی ایشیا کے ڈائریکٹر جہاد ازعور سے تفصیلی ملاقات کی۔ دونوں فریقوں نے پاکستان کے معاشی استحکام اور اصلاحاتی اقدامات پر بات چیت کی اور اس عمل کو جاری رکھنے کے عزم کا اظہار کیا۔

ملاقات میں ایکسٹینڈڈ فنڈ فیسلٹی (EFF) کے دوسرے جائزے پر پیش رفت پر غور کیا گیا جبکہ میکرو اکنامک استحکام کی اہمیت پر بھی زور دیا گیا۔

سینیٹر محمد اورنگزیب نے کامن ویلتھ اجلاس میں شرکت کے دوران پائیدار ترقی، مضبوط شراکت داری اور ٹیکنیکل اسسٹنس فنڈ کے قیام کی حمایت کی۔ ان کا کہنا تھا کہ ترقی پذیر ممالک کی استعداد کار بڑھانے کے لیے مشترکہ مالیاتی ڈھانچے ناگزیر ہیں۔

وزیر خزانہ نے عالمی بینک کے سینیئر منیجنگ ڈائریکٹر ایکسل وین ٹروٹسین برگ سے ملاقات میں پاکستان کے ترقیاتی پروگرام کے لیے تعاون پر شکریہ ادا کیا۔ انہوں نے کہا کہ موسمیاتی تبدیلی پاکستان کے لیے وجودی خطرہ بن چکی ہے، حالیہ سیلاب اس کی واضح مثال ہیں۔

بعدازاں، وزیر خزانہ نے یو ایس پاکستان بزنس کونسل کے اراکین سے بھی ملاقات کی، جس میں پاکستان کے معاشی اشاریوں میں بہتری، نجی شعبے کے فروغ اور امریکی سرمایہ کاری کے امکانات پر گفتگو کی گئی۔ انہوں نے کہا کہ مائننگ، زراعت، آئی ٹی اور فارماسیوٹیکل جیسے شعبے دوطرفہ تعاون کے وسیع مواقع فراہم کرتے ہیں۔