کینیڈا کے شہر مسّی ساگا میں 29 ستمبر سے یکم اکتوبر 2025ء تک جاری رہنے والے “اپیرل ٹیکسٹائل سورسنگ (ATS) شو” میں پاکستانی ٹیکسٹائل صنعت نے شاندار شرکت کی۔ اس بین الاقوامی تجارتی میلے میں پاکستان سمیت چین، بنگلا دیش، ویتنام اور کینیڈا کے نمائندوں نے حصہ لیا، جس نے اس نمائش کو عالمی سورسنگ اور صنعت سے جڑے ماہرین کے لیے ایک نمایاں پلیٹ فارم بنا دیا۔

پاکستانی نمائش کنندگان نے اعلیٰ معیار کی ویلیو ایڈڈ مصنوعات پیش کیں، جن میں اسپورٹس ویئر، ٹیکنیکل ٹیکسٹائلز اور حفاظتی ملبوسات شامل تھے۔ یہ نمائش پاکستان کی ٹیکسٹائل صنعت میں مہارت، پائیداری اور ہائی پرفارمنس مصنوعات کی ترقی کی بھرپور عکاسی کرتی ہے۔

شرکاء نے بتایا کہ اس سال کا رسپانس سابقہ برسوں کی نسبت خاصا بہتر رہا، اور متعدد خریداروں و صنعت کاروں سے مثبت تجارتی روابط قائم ہوئے۔ اس موقع پر شمالی امریکا میں ابھرتے ہوئے رجحانات، خاص طور پر ماحول دوست ٹیکسٹائل کی بڑھتی ہوئی مانگ سے متعلق قیمتی معلومات بھی حاصل کی گئیں، جو آئندہ تجارتی حکمتِ عملی کے لیے معاون ثابت ہوں گی۔

بھارت کی ریاست کرناٹک میں مقبول رئیلٹی شو ’’بگ باس کناڈا سیزن 12‘‘ کو ماحولیاتی قوانین کی سنگین خلاف ورزیوں کے باعث اچانک بند کر دیا گیا۔ کرناٹک اسٹیٹ پولوشن کنٹرول بورڈ (KSPCB) کی جانب سے کارروائی کرتے ہوئے شو کے اسٹوڈیو کو سیل کر دیا گیا اور بجلی کا کنکشن بھی منقطع کر دیا گیا۔ حکام کے مطابق، بگ باس ہاؤس بغیر کسی ماحولیاتی اجازت نامے کے کام کر رہا تھا، گندا پانی صاف کیے بغیر خارج کیا جا رہا تھا، سیوریج پلانٹ ناقص تھا، کچرا مناسب طریقے سے علیحدہ نہیں کیا جا رہا تھا، اور ڈیزل جنریٹرز کے استعمال سے شدید آلودگی پھیل رہی تھی۔

شو میں شریک تمام شرکا کو راتوں رات سیکیورٹی کے تحت ایگلٹن ریزورٹ منتقل کر دیا گیا، جبکہ تقریباً سات سو سے زائد عملہ، جن میں کیمرہ آپریٹرز، لائٹنگ ٹیم، اور دیگر ٹیکنیکل اسٹاف شامل تھا، کو بھی فوری طور پر ہٹا دیا گیا۔

’’بگ باس کناڈا سیزن 12‘‘ کا آغاز چند ہفتے قبل بڑے شاندار انداز میں ہوا تھا، اور اسے اداکار کچا سدیپ کے وژن کے مطابق تیار کیا گیا تھا۔ محل نما سیٹ پر پانچ کروڑ روپے سے زائد لاگت آئی تھی، مگر ماحولیاتی اصولوں کی خلاف ورزیوں کے سبب اسے بند کر دیا گیا۔ ریاستی وزیر ماحولیات و جنگلات نے کارروائی کی تصدیق کرتے ہوئے کہا کہ انتظامیہ کو بارہا نوٹس دیے گئے تھے لیکن وہ مسلسل نظر انداز کرتے رہے۔ حکام نے منتظمین کو مشورہ دیا ہے کہ اگر وہ چاہیں تو قانونی چارہ جوئی کے لیے عدالت سے رجوع کر سکتے ہیں۔