پنجاب حکومت نے سابق وزیراعظم عمران خان کے خلاف جی ایچ کیو حملہ کیس میں جیل ٹرائل کا نوٹیفکیشن واپس لے لیا ہے، جس کے بعد اب اس کیس سمیت 9 مئی کے مقدمات کی سماعت انسداد دہشت گردی عدالت (اے ٹی سی) راولپنڈی میں ہوگی۔

سرکاری ذرائع کے مطابق نیا نوٹیفکیشن جاری کر دیا گیا ہے، جس کے تحت عمران کو آئندہ سماعتوں میں ویڈیو لنک کے ذریعے پیش کیا جائے گا۔ دیگر ملزمان کو عدالت میں ذاتی حیثیت میں پیش ہونا ہوگا۔

عدالت میں میڈیا سے گفتگو کرتے ہوئے عمران خان کے وکیل فیصل ملک نے کہا کہ “آج 9 مئی کے 12 مقدمات کی سماعت تھی، جس میں جی ایچ کیو حملہ کیس سمیت تمام مقدمات کی سماعت یکم اکتوبر تک ملتوی کر دی گئی ہے۔”

ان کا مزید کہنا تھا کہ عدالت کو بتایا گیا ہے کہ “ایک نیا نوٹیفکیشن جاری ہوا ہے، جس کے تحت کیس اڈیالہ جیل سے واپس اے ٹی سی راولپنڈی منتقل کر دیا گیا ہے اور عمران خان کو ویڈیو لنک کے ذریعے پیش کیا جائے گا۔”

فیصل ملک نے پنجاب حکومت کے فیصلے پر اعتراض اٹھاتے ہوئے کہا کہ “ہم ویڈیو لنک کے فیصلے کو مسترد کرتے ہیں اور عمران خان کی عدالت میں ذاتی پیشی کے لیے درخواست دائر کریں گے۔”

اس معاملے پر عدالتی رپورٹر دُرّے اقبال نے تبصرہ کرتے ہوئے کہا کہ “عمران کی جیل میں ہونے والی ملاقاتیں اور بیانات روکنے کے لیے پنجاب حکومت نے یہ نوٹیفکیشن واپس لیا ہے، اور اب حکومت چاہتی ہے کہ عمران خان کی عدالت تک رسائی محدود رہے۔”

بلوچستان کے ضلع خضدار میں سکیورٹی فورسز نے انٹیلیجنس معلومات کی بنیاد پر کامیاب کارروائی کرتے ہوئے بھارت کے حمایت یافتہ دہشتگرد گروہ فتنہ الہندستان کے 5 دہشتگردوں کو ہلاک کر دیا۔ پاک فوج کے شعبہ تعلقات عامہ (آئی ایس پی آر) کے مطابق یہ آپریشن 14 اور 15 ستمبر 2025 کی درمیانی شب انجام دیا گیا۔

ترجمان کے مطابق دہشتگردوں کے ٹھکانے کو مؤثر انداز میں نشانہ بنایا گیا، اور شدید فائرنگ کے تبادلے کے بعد پانچ دہشتگردوں کو جہنم واصل کیا گیا۔ کارروائی کے دوران بھاری مقدار میں اسلحہ، گولہ بارود اور بارودی مواد بھی برآمد ہوا جو متعدد دہشتگردانہ سرگرمیوں میں استعمال کیا جانا تھا۔

آئی ایس پی آر کا کہنا ہے کہ خضدار میں سرچ اور کلیئرنس آپریشن تاحال جاری ہے تاکہ کسی بھی باقی ماندہ دہشتگرد کو انجام تک پہنچایا جا سکے۔ سکیورٹی فورسز ملک کو دہشتگردی سے مکمل پاک کرنے کے لیے پرعزم ہیں، اور پوری قوم ان کے شانہ بشانہ کھڑی ہے۔

دوسری جانب ضلع کیچ کے علاقے شیر بندی میں سکیورٹی فورسز کی گاڑی کو دہشتگردوں نے آئی ای ڈی دھماکے سے نشانہ بنایا، جس کے نتیجے میں پاک فوج کے 5 جوان شہید ہو گئے۔ شہداء میں کیپٹن وقار احمد، نائیک اسمت اللہ، لانس نائیک جنید احمد، خان محمد اور سپاہی محمد ظہور شامل ہیں۔

فوجی ترجمان نے بتایا کہ اسی علاقے میں کی گئی جوابی کارروائی میں بھارتی پراکسی نیٹ ورک فتنہ الہندستان کے مزید 5 دہشتگردوں کو بھی ہلاک کر دیا گیا ہے۔ یہ آپریشنز پاکستان کے عزم کی علامت ہیں کہ ملک دشمن عناصر کو کسی صورت برداشت نہیں کیا جائے گا۔