پاکستانی شوبز کی معروف اداکارہ اریج فاطمہ نے انکشاف کیا ہے کہ وہ ایک نایاب اور تیزی سے پھیلنے والے کینسر “کوریوکارسینوما” میں مبتلا ہونے کے بعد صحتیاب ہوچکی ہیں۔ سوشل میڈیا پر تصاویر شیئر کرتے ہوئے انہوں نے بتایا کہ اچھی اور پرسکون زندگی گزارنے کے دوران اچانک یہ بیماری سامنے آئی، جو مولر پریگننسی کے بعد پیدا ہو سکتی ہے۔ اریج کے مطابق گزشتہ چار ماہ ان اور ان کے خاندان کے لیے انتہائی کٹھن ثابت ہوئے اور انہوں نے اس دوران بیماری کے بارے میں کسی سے بات نہیں کی کیونکہ انہیں مذاق اڑائے جانے کا ڈر تھا۔ اداکارہ نے بتایا کہ ان کے دو بڑے خوف اللہ کے سامنے جواب دہی اور خاندان کے مستقبل سے متعلق تھے۔ انہوں نے مداحوں کو مشورہ دیا کہ باقاعدگی سے میڈیکل چیک اپ کروائیں اور اس بیماری کو سنجیدگی سے لیں۔ اریج نے صحتیابی کو اپنی “دوسری زندگی” قرار دیتے ہوئے خاندان کی سپورٹ کا شکریہ ادا کیا۔ 2017 میں ڈاکٹر عزیر علی سے شادی کرنے والی اریج کے دو بیٹے ہیں اور وہ امریکی ریاست اوہائیو میں رہائش پذیر ہیں۔ 2019 میں کامیاب ڈرامہ “حسد” کے بعد شوبز کو خیرباد کہنے والی اریج اب ڈیجیٹل کریئیٹر اور انفلوئنسر کے طور پر سرگرم ہیں، ان کے دیگر مقبول ڈراموں میں “ایک پل”، “آپ کے لیے”، “عشق پرست” اور “ہم نشین” شامل ہیں۔

پاکستان تحریک انصاف کے رہنما اور سابق اسپیکر قومی اسمبلی اسد قیصر نے اعتراف کیا ہے کہ پی ٹی آئی حکومت کے دوران سابق آرمی چیف جنرل ریٹائرڈ قمر جاوید باجوہ کو ایکسٹینشن دینا ان کی سب سے بڑی غلطی تھی اور اس پر وہ قوم سے معافی مانگتے ہیں۔ اسلام آباد میں پریس کانفرنس کے دوران انہوں نے کہا کہ آئندہ وہ کسی ایسے فیصلے کا حصہ نہیں ہوں گے۔ ان کا کہنا تھا کہ ملک میں موجودہ نظام نہ آئینی ہے اور نہ قانونی بلکہ عملاً مارشل لاء نافذ ہے۔ انہوں نے 27ویں آئینی ترمیم کی تجویز کو مسترد کرتے ہوئے کہا کہ اس کے خلاف وکلاء تحریک کا آغاز کیا جا رہا ہے اور پارلیمان کے اندر اور باہر ہر فورم پر اس کا مقابلہ کیا جائے گا۔ اسد قیصر نے واضح کیا کہ اپوزیشن لیڈر کے لیے ان کے نام کی بات درست نہیں، امید ہے عمر ایوب جلد واپس آ کر یہ ذمہ داری سنبھالیں گے۔ انہوں نے مطالبہ کیا کہ عمران خان کے کیسز میرٹ پر سنے جائیں، اسمبلی ارکان کا استحقاق بحال کیا جائے اور جیلوں کے دورے پر پابندی غیر قانونی قرار دی۔ ان کا کہنا تھا کہ اس وقت بیشتر فیصلے انتظامیہ کے دباؤ پر کیے جا رہے ہیں اور اگر حالات ایسے ہی رہے تو ملک شدید انارکی کی طرف جا سکتا ہے۔