پاکستان اور بنگلہ دیش نے سفارتی اور سرکاری پاسپورٹس رکھنے والے افراد کو ویزہ فری انٹری کی سہولت دینے پر اصولی اتفاق کر لیا ہے، جب کہ دونوں ممالک کے درمیان دوطرفہ تعلقات کو مزید مستحکم بنانے کے لیے ایک مشترکہ کمیٹی بھی تشکیل دی گئی ہے۔ پاکستان اور بنگلہ دیش اس سلسلے میں وفاقی وزیر داخلہ محسن نقوی نے ڈھاکہ میں اپنے بنگلہ دیشی ہم منصب لیفٹیننٹ جنرل (ر) جہانگیر عالم چوہدری سے ملاقات کی، جہاں ان کا شاندار استقبال کیا گیا اور گارڈ آف آنر پیش کیا گیا۔ ملاقات میں دوطرفہ دلچسپی کے امور، سیکیورٹی تعاون، پولیس ٹریننگ اور انسداد دہشت گردی جیسے شعبوں میں اشتراک پر تفصیلی بات چیت ہوئی۔ دونوں وزرائے داخلہ نے انٹرنل سیکیورٹی اور پولیس تربیت کے میدان میں تعاون بڑھانے پر اتفاق کیا اور مشترکہ کمیٹی تشکیل دی گئی جس کی سربراہی پاکستان کی جانب سے سیکریٹری داخلہ خرم آغا کریں گے۔ اس کے علاوہ بنگلہ دیش کا ایک اعلیٰ سطحی وفد سیف سٹی پراجیکٹ اور نیشنل پولیس اکیڈمی کے دورے کے لیے جلد اسلام آباد آئے گا۔ ملاقات میں انسداد منشیات، انسانی سمگلنگ اور دہشت گردی جیسے اہم مسائل پر مل کر کام کرنے پر بھی اتفاق کیا گیا، جب کہ پولیس اکیڈمیوں کے مابین تربیتی پروگرامز کے تبادلے پر بھی گفتگو ہوئی۔ بنگلہ دیشی وزیر داخلہ نے پاکستان کی جانب سے دی گئی تربیتی پیشکش پر شکریہ ادا کرتے ہوئے اس دورے کو دونوں ممالک کے تعلقات کے فروغ میں اہم سنگ میل قرار دیا۔

معروف بھارتی اداکارہ اور سابق مس انڈیا یونیورس تنوشری دتہ، جنہوں نے عمران ہاشمی کے ساتھ فلم “آپ کی کشش” میں ڈیبیو کیا، نے ایک چونکا دینے والا انکشاف کرتے ہوئے بتایا ہے کہ وہ اپنے ہی گھر میں مسلسل ہراسانی کا شکار ہو رہی ہیں۔ تنوشری دتہ نے حال ہی میں انسٹاگرام پر ایک جذباتی ویڈیو شیئر کی جس میں وہ روتے ہوئے دکھائی دیں اور عوام سے مدد کی اپیل کی۔ اداکارہ نے بتایا کہ 2018 میں #MeToo مہم کے دوران سامنے آنے کے بعد سے انہیں ذہنی اذیت، دباؤ اور مسلسل ہراسانی کا سامنا ہے۔ ان کا کہنا تھا کہ گزشتہ دنوں جب حالات برداشت سے باہر ہو گئے تو انہوں نے پولیس کو کال کی، جس پر پولیس ان کے گھر آئی اور انہیں شکایت درج کروانے کا مشورہ دیا۔ تنوشری کے مطابق انہیں جسمانی طور پر بھی کمزوری لاحق ہے، لیکن وہ جلد ہی تھانے جا کر باضابطہ شکایت درج کروائیں گی۔ اداکارہ نے مزید دعویٰ کیا کہ ایک سوچی سمجھی سازش کے تحت ان کے گھر ایسی گھریلو ملازمائیں تعینات کی گئیں جنہوں نے چوری اور پریشانی کا باعث بننے جیسے اقدامات کیے، جس کے باعث وہ اپنے گھر میں بھی غیرمحفوظ محسوس کر رہی ہیں۔ انہوں نے پوسٹ کے کیپشن میں لکھا کہ 2018 سے اب تک وہ مسلسل ہراسانی کا سامنا کر رہی ہیں اور اب تنگ آ کر پولیس کو بلایا ہے۔ تنوشری کی یہ ویڈیو سوشل میڈیا پر تیزی سے وائرل ہو گئی ہے اور ان کے مداحوں نے حکام سے فوری کارروائی کا مطالبہ کیا ہے۔