پاکستان اور بنگلہ دیش نے سفارتی اور سرکاری پاسپورٹس رکھنے والے افراد کو ویزہ فری انٹری کی سہولت دینے پر اصولی اتفاق کر لیا ہے، جب کہ دونوں ممالک کے درمیان دوطرفہ تعلقات کو مزید مستحکم بنانے کے لیے ایک مشترکہ کمیٹی بھی تشکیل دی گئی ہے۔ پاکستان اور بنگلہ دیش اس سلسلے میں وفاقی وزیر داخلہ محسن نقوی نے ڈھاکہ میں اپنے بنگلہ دیشی ہم منصب لیفٹیننٹ جنرل (ر) جہانگیر عالم چوہدری سے ملاقات کی، جہاں ان کا شاندار استقبال کیا گیا اور گارڈ آف آنر پیش کیا گیا۔ ملاقات میں دوطرفہ دلچسپی کے امور، سیکیورٹی تعاون، پولیس ٹریننگ اور انسداد دہشت گردی جیسے شعبوں میں اشتراک پر تفصیلی بات چیت ہوئی۔ دونوں وزرائے داخلہ نے انٹرنل سیکیورٹی اور پولیس تربیت کے میدان میں تعاون بڑھانے پر اتفاق کیا اور مشترکہ کمیٹی تشکیل دی گئی جس کی سربراہی پاکستان کی جانب سے سیکریٹری داخلہ خرم آغا کریں گے۔ اس کے علاوہ بنگلہ دیش کا ایک اعلیٰ سطحی وفد سیف سٹی پراجیکٹ اور نیشنل پولیس اکیڈمی کے دورے کے لیے جلد اسلام آباد آئے گا۔ ملاقات میں انسداد منشیات، انسانی سمگلنگ اور دہشت گردی جیسے اہم مسائل پر مل کر کام کرنے پر بھی اتفاق کیا گیا، جب کہ پولیس اکیڈمیوں کے مابین تربیتی پروگرامز کے تبادلے پر بھی گفتگو ہوئی۔ بنگلہ دیشی وزیر داخلہ نے پاکستان کی جانب سے دی گئی تربیتی پیشکش پر شکریہ ادا کرتے ہوئے اس دورے کو دونوں ممالک کے تعلقات کے فروغ میں اہم سنگ میل قرار دیا۔

بین الاقوامی مالیاتی فنڈ (آئی ایم ایف) نے حکومت پاکستان سے گیس کے شعبے میں بڑھتے ہوئے گردشی قرضے کو ختم کرنے کے لیے مکمل اور واضح پلان طلب کر لیا ہے۔ ذرائع کے مطابق، پیٹرولیم ڈویژن نے انکشاف کیا ہے کہ گیس سیکٹر کا گردشی قرضہ اب 2800 ارب روپے تک پہنچ چکا ہے، جو نہ صرف سوئی سدرن اور سوئی ناردن گیس کمپنیز بلکہ سرکاری تیل و گیس کے اداروں کے لیے بھی شدید مالی نقصان کا باعث بن رہا ہے۔ حکومت نے اس قرض سے چھٹکارا حاصل کرنے کے لیے حکمت عملی بنانا شروع کر دی ہے جس کے تحت بینکوں سے دو ہزار ارب روپے تک قرض حاصل کرنے پر غور کیا جا رہا ہے۔ اس مقصد کے لیے بینکوں سے آسان شرائط پر قرض لینے کی مشاورت جاری ہے، جب کہ 800 ارب روپے کے سود کی معافی یا اس میں کمی کے لیے بھی بینکوں سے بات چیت ہو رہی ہے۔آئی ایم ایف قرض کی ادائیگی کے لیے حکومت پیٹرولیم مصنوعات پر 3 سے 10 روپے فی لیٹر لیوی عائد کرنے اور گیس بلوں میں اضافی سرچارج شامل کرنے جیسے اقدامات پر بھی غور کر رہی ہے۔ ذرائع کے مطابق حکومت یہ قرض آئندہ پانچ سال کے دوران مرحلہ وار واپس کرے گی، اور اگر پیٹرولیم لیوی عائد کر دی جاتی ہے تو اس سے حکومت کو سالانہ 180 ارب روپے کی آمدن متوقع ہے۔ تاہم، گردشی قرضے کے مکمل خاتمے کے لیے حکومت کو سوئی گیس کمپنیوں کے غیرمعمولی مالی نقصانات پر بھی قابو پانا ہو گا۔