کسان اتحاد کے صدر خالد محمود کھوکھر نے ایک پریس کانفرنس میں انکشاف کیا ہے کہ ملک کے کاشتکاروں کو صرف گندم کی فصل کی مد میں گزشتہ دو سال کے دوران 2200 ارب روپے کا بھاری نقصان برداشت کرنا پڑا ہے۔ انہوں نے کہا کہ ملکی زراعت اس وقت مکمل زبوں حالی کا شکار ہے اور کاشتکاروں کے حالات بد سے بدتر ہو چکے ہیں۔ کسان نئی فصلوں کی کاشت کے لیے مالی طور پر تیار نہیں، کیونکہ حکومت کی پالیسیوں کی وجہ سے انہیں اپنی پیداوار کی مناسب قیمت نہیں مل رہی۔ خالد کھوکھر نے سوال اٹھایا کہ حکومت نے جو زرعی پیکجز متعارف کرائے تھے، ان کے نتائج کہاں ہیں؟ انہوں نے کہا کہ زرعی ایکسپورٹ میں نمایاں کمی واقع ہوئی ہے، چاول کی برآمدات میں چھ ماہ کے دوران 11 فیصد کمی آئی ہے جبکہ دیگر فصلوں کی برآمدات بھی متاثر ہوئیں۔ ان کا کہنا تھا کہ کسان کو ہر فصل سے کم از کم 25 فیصد منافع ملنا چاہیے، کیونکہ جب کسان خوشحال ہوگا تو ملک میں بھی خوشحالی آئے گی۔ انہوں نے خبردار کیا کہ اگر گندم کی موجودہ قیمت میں بہتری نہ آئی تو آئندہ سال گندم کی پیداوار میں شدید کمی کا سامنا ہو سکتا ہے۔ خالد کھوکھر نے زور دیا کہ کاشتکاروں کے مسائل کے حل کے لیے فوری اور مؤثر حکمت عملی ترتیب دی جائے، بصورت دیگر زراعت مزید بحران کا شکار ہو سکتی ہے۔ ان کا کہنا تھا کہ غربت کے باعث کسان اپنے بچوں کو معیاری تعلیم بھی نہیں دے پا رہے، اگر گندم کی قیمت 3550 روپے فی من مقرر کی جاتی تو آج کسان بھی خوشحال ہوتا اور دیگر فصلوں کی پیداوار میں اضافہ ممکن ہوتا۔ انہوں نے مطالبہ کیا کہ کاشتکاروں کو سستی بجلی اور دیگر مراعات فراہم کی جائیں تاکہ ملک بھر میں خوشحالی اور زرعی ترقی ممکن ہو سکے۔

آج مقامی اور عالمی منڈیوں میں سونے کی قیمت میں معمولی کمی ریکارڈ کی گئی ہے۔ مقامی مارکیٹ میں فی تولہ سونا 100 روپے سستا ہو کر 3 لاکھ 56 ہزار 300 روپے پر پہنچ گیا جبکہ 10 گرام سونے کی قیمت میں 85 روپے کی کمی کے بعد یہ 3 لاکھ 5 ہزار 470 روپے ہو گئی۔ دوسری جانب عالمی منڈی میں بھی سونے کی قیمت ایک ڈالر کم ہو کر 3336 ڈالر فی اونس ریکارڈ کی گئی، جس کے بعد سرمایہ کاروں کی توجہ قیمتوں میں ممکنہ مزید اتار چڑھاؤ پر مرکوز ہے۔