فیلڈ مارشل عاصم منیر، نشان امتیاز (ملٹری) اور چیف آف آرمی اسٹاف نے نیشنل ڈیفنس یونیورسٹی اسلام آباد کا دورہ کیا جہاں انہوں نے نیشنل سیکیورٹی اور وار کورس کے گریجویٹنگ افسران سے خطاب کیا۔ اس موقع پر انہوں نے بھارت کی جانب سے جاری ’’آپریشن سندور‘‘ پر تبصرہ کرتے ہوئے کہا کہ بھارت اپنے مقرر کردہ فوجی اہداف حاصل کرنے میں ناکام رہا، اور اگر بھارت نے پاکستان کی خودمختاری یا سالمیت کے خلاف کسی بھی قسم کی مہم جوئی کی تو اس کا جواب بغیر کسی ہچکچاہٹ کے سخت، گہرا، تکلیف دہ اور سوچ سے بڑھ کر ہوگا۔ انہوں نے کہا کہ پاکستان کی مسلح افواج مکمل تیاری کے ساتھ کسی بھی ہائبرڈ، روایتی یا غیر روایتی خطرے کا مقابلہ کرنے کی صلاحیت رکھتی ہیں، اور قومی سلامتی کے معاملے میں کوئی سمجھوتہ نہیں ہوگا۔

آرمی چیف نے بھارت کے الزامات کو بے بنیاد قرار دیتے ہوئے کہا کہ پاکستان کی کامیابیاں دہائیوں پر مبنی حکمت عملی، مقامی صلاحیتوں اور مضبوط ادارہ جاتی ڈھانچے کی مرہون منت ہیں، اور بھارت ان کامیابیوں کو تسلیم کرنے سے گریزاں ہے۔ انہوں نے واضح کیا کہ بھارت کی یہ کوشش کہ وہ دوطرفہ فوجی تصادم کو علاقائی یا بین الاقوامی مسئلہ بنا دے، ایک ناقص سیاسی حکمت عملی کا حصہ ہے۔ انہوں نے پاکستان کی اصولی سفارتکاری، باہمی احترام اور امن پر مبنی بین الاقوامی تعلقات کو سراہتے ہوئے کہا کہ پاکستان ایک مستحکم ریجنل اسٹیبلائزر کے طور پر دنیا کے سامنے آیا ہے۔

خطاب کے دوران فیلڈ مارشل عاصم منیر نے کہا کہ اگر بھارت نے پاکستان کے آبادیاتی مراکز، فوجی تنصیبات، اقتصادی مراکز یا بندرگاہوں کو نشانہ بنانے کی کوشش کی، تو اس کا ردعمل انتہائی سخت اور ناقابلِ برداشت ہوگا، اور اس کشیدگی کی تمام تر ذمہ داری بھارت پر عائد ہوگی۔ انہوں نے افسران پر زور دیا کہ وہ دیانتداری، بے لوث خدمت اور قومی عزم کے ساتھ اپنے فرائض سرانجام دیں، کیونکہ جنگیں صرف بیانات، جدید ہتھیاروں یا سیاسی نعروں سے نہیں بلکہ یقینِ محکم، پیشہ ورانہ قابلیت، ادارہ جاتی مضبوطی اور قومی اتحاد سے جیتی جاتی ہیں۔

کراچی سے موصولہ اطلاعات کے مطابق پاکستان اسٹاک ایکسچینج میں پیر کے روز کاروباری ہفتے کا آغاز زبردست تیزی کے ساتھ ہوا، جس کے نتیجے میں انڈیکس نے ایک نئی تاریخ رقم کر دی۔ کاروبار کے آغاز پر ہی 1066 پوائنٹس کا بڑا اضافہ دیکھا گیا، جس سے کے ایس ای 100 انڈیکس ایک لاکھ 33 ہزار 15 پوائنٹس کی سطح تک جا پہنچا۔

مارکیٹ میں تیزی کا رجحان برقرار رہا اور دن کے مختلف اوقات میں انڈیکس میں 1128، 1308، 1442، 1606، 1705 اور آخر کار 1802 پوائنٹس کی غیر معمولی تیزی ریکارڈ کی گئی۔ اس مسلسل بہتری کے نتیجے میں پاکستان اسٹاک ایکسچینج کا کے ایس ای 100 انڈیکس ایک نئی تاریخی بلند ترین سطح، یعنی 133,751 پوائنٹس تک پہنچ گیا۔

واضح رہے کہ گزشتہ ہفتے بھی اسٹاک مارکیٹ میں شاندار تیزی دیکھنے میں آئی تھی اور کئی اہم سطحیں عبور کرتے ہوئے انڈیکس نے نئی بلندیوں کو چھوا تھا۔ سرمایہ کاروں کے اعتماد اور حکومتی پالیسیوں کے اثرات نے مارکیٹ میں استحکام اور ترقی کو فروغ دیا ہے، جس کے مثبت نتائج اب مسلسل نظر آ رہے ہیں