سپریم کورٹ کے مخصوص نشستوں کے نظرثانی فیصلے پر پاکستان تحریک انصاف نے سخت ردعمل دیتے ہوئے اسے آئین، انصاف اور جمہوریت کے خلاف ایک سنگین اقدام قرار دیا ہے۔ پارٹی ترجمان نے اپنے بیان میں کہا کہ آج ایک بار پھر سپریم کورٹ کے ذریعے پاکستان تحریک انصاف کے آئینی حق پر ڈاکہ ڈالا گیا ہے، اور اس عمل نے نہ صرف انصاف کی روح کو کچلا بلکہ عوام کے ووٹ اور نمائندگی کو بھی روند ڈالا ہے۔ ترجمان نے کہا کہ ماضی میں اسی عدالت نے پی ٹی آئی کے حق میں مخصوص نشستوں کے حوالے سے فیصلہ دیا تھا، مگر آج عدالت نے اپنے ہی اصول کی نفی کرتے ہوئے ایک ایسا فیصلہ دیا ہے جو پاکستان کی عدالتی تاریخ کے سیاہ دنوں میں شمار ہوگا۔

پی ٹی آئی کا مؤقف ہے کہ یہ فیصلہ محض عدالتی کارروائی نہیں بلکہ ایک طے شدہ ریاستی منصوبے کا تسلسل ہے جس کے تحت تحریک انصاف کو کچلنے کی کوششیں کی جا رہی ہیں۔ ترجمان کا کہنا تھا کہ پہلے الیکشن چوری کیے گئے، بلے کا نشان چھینا گیا، کارکنان کو اغوا کیا گیا، میڈیا پر مکمل بلیک آؤٹ نافذ کیا گیا اور اب مخصوص نشستوں کو بھی سیاسی مخالفین میں اس طرح بانٹا گیا جیسے وہ مالِ غنیمت ہو۔ یہ سب کچھ محض اس وجہ سے کیا گیا کیونکہ عمران خان عوامی حمایت رکھتے ہیں۔ ترجمان نے مزید کہا کہ پاکستان اب ایک جمہوری ریاست نہیں بلکہ ایک استبدادی نظام میں بدل چکا ہے جہاں سچ بولنا جرم، حق مانگنا بغاوت اور عمران خان کو ووٹ دینا ناقابلِ معافی گناہ بن چکا ہے۔

پی ٹی آئی نے کہا کہ ان پر جبر کی انتہا کی گئی ہے، کارکنان کو نشانہ بنایا جا رہا ہے اور عوام کے تمام بنیادی حقوق سلب کیے جا رہے ہیں، لیکن اس کے باوجود ان کے حوصلے بلند ہیں۔ ان کے مطابق ہر دروازہ بند کر دیا گیا ہے سوائے جیل اور قبرستان کے، مگر ان کی امید عمران خان کی قیادت اور عوام کی حمایت سے جڑی ہوئی ہے۔ ترجمان نے کہا کہ ہم زخمی ضرور ہیں لیکن عمران خان کے نظریئے کی مرہم ہمارے پاس موجود ہے۔ عدالتوں سے ہم ناامید ہو چکے ہیں، لیکن عوام سے نہیں، اور ہمیں یقین ہے کہ آخری فتح انشاء اللہ حق، آئین اور عمران خان کی ہو گی۔