یومِ تکبیر کے موقع پر، مسلح افواج، چیئرمین جوائنٹ چیفس آف اسٹاف کمیٹی اور سروسز چیفس نے پاکستانی عوام کو دل کی گہرائیوں سے مبارکباد دی ہے۔ اس دن کی اہمیت اس تاریخی لمحے سے جڑی ہوئی ہے جب 1998 میں پاکستان نے کامیاب جوہری تجربات کر کے دنیا کو یہ پیغام دیا کہ ملک اب ایک ناقابل تسخیر جوہری طاقت بن چکا ہے۔ یومِ تکبیر پاکستان کی دفاعی خودمختاری، قومی عزم اور اتحاد کی علامت ہے۔ افواج پاکستان کی جانب سے جاری کردہ خصوصی پیغام میں کہا گیا ہے کہ یومِ تکبیر اس قیادت کی دوراندیشی اور ان سائنسدانوں اور انجینئروں کی محنت کا ثبوت ہے جنہوں نے ملک کو جوہری طاقت بنایا۔ یہ دن اُن تمام لوگوں کو خراج تحسین پیش کرتا ہے جن کی خدمات نے ملکی دفاع کو ناقابل تسخیر بنایا۔ آئی ایس پی آر کے مطابق، پاکستان کی جوہری صلاحیت صرف دفاعی مقاصد کے لیے ہے اور یہ ملک کے امن کی ضامن ہے۔ پاکستان خطے میں اسٹریٹیجک توازن اور امن کو فروغ دینے کے اصول پر قائم ہے، جبکہ اسٹریٹیجک صلاحیت کو عوام کی امنگوں کا ترجمان اور ایک قومی امانت قرار دیا گیا ہے۔ مسلح افواج نے اس عزم کا اعادہ کیا ہے کہ وہ مادرِ وطن کے دفاع، ترقی اور خوشحالی کے لیے ہر وقت تیار اور پرعزم ہیں۔ اس دن کے موقع پر اُن تمام شہداء اور ہیروز کو سلام پیش کیا گیا جنہوں نے ملک کی دفاعی خودمختاری کے لیے قربانیاں دیں۔

آج پاکستان کے ایٹمی دھماکوں کو 27 سال مکمل ہو گئے ہیں، اور اس موقع پر ملک بھر میں یوم تکبیر ملی جوش و خروش کے ساتھ منایا جا رہا ہے۔ 28 مئی 1998 کو، اس وقت کے وزیراعظم نواز شریف کی قیادت میں، بلوچستان کے چاغی میں چھ کامیاب ایٹمی دھماکے کیے گئے تھے۔ یہ دھماکے بھارت کے پانچ ایٹمی دھماکوں کا بھرپور جواب تھے اور اس کے ذریعے خطے میں طاقت کا توازن بحال کیا گیا۔ اس شاندار کارنامے نے پاکستان کو دنیا کی ساتویں اور امتِ مسلمہ کی پہلی ایٹمی طاقت بنا دیا۔

یومِ تکبیر کے موقع پر آج ملک بھر میں عام تعطیل ہے، اور وفاقی و صوبائی سطح پر خصوصی تقریبات، سیمینارز، ریلیوں اور ملی نغموں کے ذریعے وطن کی سلامتی، خودمختاری اور ایٹمی طاقت پر فخر کا اظہار کیا جا رہا ہے۔ نوجوان نسل کو اس تاریخی دن کی اہمیت سے آگاہ کرنے کے لیے چاغی سمیت مختلف شہروں میں تقریبات کا انعقاد کیا جا رہا ہے۔

چیئرمین سینیٹ سید یوسف رضا گیلانی نے اپنے پیغام میں کہا کہ یوم تکبیر 28 مئی پاکستان کی دفاعی تاریخ کا ایک سنہری دن ہے، جب ہم نے اپنی سلامتی کے تحفظ کے لیے ایک جرات مندانہ فیصلہ کیا اور ناقابل تسخیر دفاعی صلاحیت حاصل کی۔ انہوں نے شہید ذوالفقار علی بھٹو کو خراج عقیدت پیش کیا، جنہوں نے پاکستان کے ایٹمی پروگرام کی بنیاد رکھی۔ یومِ تکبیر ہمیں اتحاد، عزم اور استقلال کی اہمیت کا احساس دلاتا ہے۔