حکومت کا مہنگائی بم نئے مالی سال کے آغاز پر وفاقی حکومت نے عوام پر مہنگائی کا دباؤ مزید بڑھاتے ہوئے پیٹرولیم مصنوعات اور گیس کی قیمتوں میں نمایاں اضافہ کر دیا ہے۔ حکومت کا مہنگائی بم ، وزارت خزانہ کی جانب سے رات گئے جاری کردہ نوٹیفکیشن کے مطابق پیٹرول کی قیمت میں 8 روپے 36 پیسے جبکہ ڈیزل کی قیمت میں 10 روپے 39 پیسے فی لیٹر کا اضافہ کیا گیا ہے، جس کے بعد پیٹرول 266 روپے 79 پیسے اور ڈیزل 272 روپے 98 پیسے فی لیٹر میں دستیاب ہوگا۔ یہ اضافہ ایسے وقت میں کیا گیا ہے جب بین الاقوامی مارکیٹ میں تیل کی قیمتوں میں کمی دیکھی جا رہی ہے۔ ماہرین کے مطابق اس اضافے کی ممکنہ وجہ حکومت کی جانب سے پٹرولیم لیوی اور کاربن ٹیکس میں اضافہ ہے۔

دوسری جانب، آئل اینڈ گیس ریگولیٹری اتھارٹی (اوگرا) نے بھی گیس کی قیمتوں میں بھاری اضافہ کرتے ہوئے یکم جولائی سے نئے نرخوں کا اطلاق کر دیا ہے۔ نوٹیفکیشن کے مطابق گھریلو صارفین کے لیے گیس کی قیمت 200 روپے سے لے کر 4200 روپے فی ایم ایم بی ٹی یو تک مقرر کی گئی ہے۔ پروٹیکٹڈ گھریلو صارفین کے لیے نرخ 200 سے 350 روپے جبکہ نان پروٹیکٹڈ صارفین کے لیے یہ نرخ 500 سے 4200 روپے تک پہنچ گئے ہیں۔ مزید برآں، پروٹیکٹڈ صارفین پر 600 روپے اور نان پروٹیکٹڈ صارفین پر 1500 سے 3000 روپے تک فکسڈ چارجز عائد کیے گئے ہیں۔ اس کے علاوہ کمرشل، صنعتی، تعلیمی و سرکاری اداروں، سی این جی اسٹیشنز، کھاد و سیمنٹ فیکٹریوں اور بجلی گھروں کے لیے بھی گیس کے نئے اور بلند نرخ مقرر کیے گئے ہیں۔ حکومتی فیصلے کے نتیجے میں مہنگائی کی نئی لہر آنے کا خدشہ ظاہر کیا جا رہا ہے، جو عوام کی مشکلات میں مزید اضافہ کرے گی۔

پاکستان تحریک انصاف کے چیئرمین بیرسٹر گوہر نے واضح کیا ہے کہ وزیراعلیٰ خیبرپختونخوا علی امین گنڈاپور کے خلاف تحریک عدم اعتماد کسی صورت کامیاب نہیں ہو سکتی، اپوزیشن جماعتیں صرف اپنا شوق پورا کر لیں، ہم پوری طاقت سے اس کا مقابلہ کریں گے۔ جیو نیوز کے پروگرام میں گفتگو کرتے ہوئے بیرسٹر گوہر نے کہا کہ خیبرپختونخوا اسمبلی کے تمام پی ٹی آئی ارکان علی امین گنڈاپور کے ساتھ مضبوطی سے کھڑے ہیں، سنی اتحاد کونسل کے ٹکٹ پر منتخب ایم پی ایز میں سے کوئی بھی پارٹی چھوڑ کر نہیں جائے گا۔

انہوں نے سپریم کورٹ کے مخصوص نشستوں سے متعلق فیصلے پر مایوسی کا اظہار کرتے ہوئے کہا کہ الیکشن کمیشن نے پی ٹی آئی کو دی جانے والی مخصوص نشستیں بعد میں دیگر جماعتوں کو دے دیں، حالانکہ ہم نے 19 فروری کو باقاعدہ درخواست جمع کرائی تھی۔ ان کا کہنا تھا کہ 8 فروری کو انتخابات ہوئے، 15 فروری کو نتائج کا نوٹیفکیشن جاری ہوا اور 22 فروری کو الیکشن کمیشن کو مخصوص نشستیں الاٹ کرنی تھیں۔

گوہر خان کے مطابق مخصوص نشستوں کی تقسیم کے نتیجے میں ن لیگ، پیپلز پارٹی اور جے یو آئی جیسی جماعتوں کو ان کی جیتی ہوئی نشستوں سے بھی زیادہ مخصوص نشستیں مل گئی ہیں، جو قانون اور انصاف کے اصولوں کے خلاف ہے۔ انہوں نے کہا کہ پی ٹی آئی اسٹیٹس کو کے خلاف اور آئین و قانون کے ساتھ کھڑی ہے، اور ہر غیر آئینی اقدام کا بھرپور مزاحمت سے مقابلہ کرے گی۔