جاپان نے ماحولیاتی نگرانی کے اپنے تینریا سیٹلائٹ سلسلے کا تیسرا سیٹلائٹ GOSAT-GW کامیابی سے خلا میں بھیج دیا ہے۔ یہ لانچ جاپان کے معروف H‑2A راکٹ کے ذریعے عمل میں آیا جو اپنی 50ویں اور آخری پرواز پر روانہ ہوا، اس کے بعد اسے جدید H3 راکٹ سے تبدیل کیا جائے گا۔ یہ مشن جاپان کے تنگیشیما اسپیس سینٹر سے شروع ہوا اور پرواز کے تقریباً 16 منٹ بعد سیٹلائٹ کو کامیابی کے ساتھ اپنے مقررہ مدار میں چھوڑ دیا گیا۔ GOSAT-GW سیٹلائٹ گرین ہاؤس گیسوں اور زمینی واٹر سائیکل کی مسلسل نگرانی کرے گا، جبکہ سمندری سطح کے درجہ حرارت، بارش کے رجحانات اور قدرتی آفات سے قبل ممکنہ انتباہات کے لیے اہم ڈیٹا بھی فراہم کرے گا۔ H‑2A راکٹ نے 2001 سے اب تک کئی اہم مشنز انجام دیے جن میں Hayabusa2 اور چاند پر بھیجے جانے والا SLIM مشن شامل ہیں۔ H3 راکٹ کو کم لاگت اور زیادہ استعداد کے حامل نئے دور کے آغاز کے طور پر دیکھا جا رہا ہے۔ اس سیٹلائٹ سے حاصل ہونے والا ڈیٹا نہ صرف جاپان بلکہ امریکا سمیت دنیا بھر کے ماحولیاتی ماہرین اور تحقیقی اداروں کو دستیاب ہوگا، جس سے عالمی سطح پر موسمیاتی تبدیلیوں پر تحقیق کو تقویت ملے گی۔

حالیہ اطلاعات کے مطابق میٹا، مصنوعی ذہانت پر مبنی آواز کلوننگ پلیٹ فارم ’پلے اے آئی‘ کو خریدنے کی تیاری کر رہا ہے۔ بلومبرگ کی ایک رپورٹ میں نامعلوم ذرائع کا حوالہ دیتے ہوئے بتایا گیا ہے کہ میٹا نے اس حوالے سے پلے اے آئی کے مالکان سے بات چیت کا آغاز کر دیا ہے، جس کا مقصد اس اسٹارٹ اپ کی بنیادی ٹیکنالوجی اور اس کے کچھ عملے کو اپنی ٹیم میں شامل کرنا ہے۔ یہ پیش رفت میٹا کی مصنوعی ذہانت کی تحقیق کو تقویت دینے اور صارفین کے لیے زیادہ تخلیقی فیچرز فراہم کرنے کی حکمت عملی کا حصہ سمجھی جا رہی ہے۔ پلے اے آئی مختلف انسانی آوازوں کی نقل کرنے کی صلاحیت رکھتا ہے جسے کسٹمر سروس سمیت مختلف AI ایپلی کیشنز میں استعمال کیا جاتا ہے۔ کمپنی اب تک 23.5 ملین ڈالر کی فنڈنگ حاصل کر چکی ہے، جس میں 500 اسٹارٹ اپس، کنڈرڈ وینچرز، ریس کیپیٹل، 500 گلوبل اور سوما کیپٹل جیسے ادارے شامل ہیں۔ دوسری جانب، میٹا پہلے ہی اپنے پلیٹ فارمز پر مواد تخلیق کرنے والوں کو چیٹ بوٹس بنانے کی اجازت دے چکا ہے اور اس نے حال ہی میں اپنے میٹا اے آئی اسسٹنٹ میں ویڈیو ایڈیٹنگ ٹولز بھی شامل کیے ہیں۔ پلے اے آئی کی خریداری سے میٹا کو اپنے تخلیقی ٹولز میں جدید صوتی خصوصیات شامل کرنے کا موقع ملے گا۔ تاہم، اس ممکنہ ڈیل پر میٹا اور پلے اے آئی کی جانب سے تاحال کوئی باقاعدہ تبصرہ نہیں کیا گیا۔