گوگل کے نئے امیج ایڈیٹنگ فیچر نے اس کے اے آئی پلیٹ فارم گوگل جیمینائی کو صارفین میں بے حد مقبول بنا دیا ہے، خاص طور پر امریکا اور برطانیہ میں، جہاں یہ ایپ ایپل کے ٹاپ فری ایپس چارٹ میں چیٹ جی پی ٹی اور میٹا کی تھریڈز ایپ کو پیچھے چھوڑ کر پہلے نمبر پر آ گئی ہے۔ گوگل کی جانب سے اگست کے آخر میں لانچ کیے گئے گوگل جیمینائی 2.5 فلیش اور امیج ماڈل نینو بنانا نے شاندار پذیرائی حاصل کی ہے۔ صرف دو ہفتوں میں صارفین نے ان ماڈلز کی مدد سے 50 کروڑ سے زائد تصاویر تخلیق کیں۔ گوگل نے ان اپڈیٹس کو ’اسٹیٹ آف دی آرٹ‘ قرار دیتے ہوئے کہا تھا کہ جیمینائی وہ کام بھی کر سکتا ہے، جن کا حریف ابھی تصور بھی نہیں کر سکے۔ برطانیہ میں بھی جیمینائی نے چیٹ جی پی ٹی اور شاپنگ ایپ ٹیمو کو پیچھے چھوڑ دیا ہے، جو اس کی غیر معمولی ترقی اور مقبولیت کا واضح ثبوت ہے۔

اسلام آباد ہائی کورٹ نے جسٹس طارق محمود جہانگیری کو سپریم جوڈیشل کونسل کے فیصلے تک بطور جج کام کرنے سے روکنے کا حکم دے دیا ہے۔ چیف جسٹس سرفراز ڈوگر اور جسٹس اعظم خان پر مشتمل دو رکنی بینچ نے کیس کی سماعت کی، جس میں وکلاء کی بڑی تعداد، ڈسٹرکٹ بار اور ہائی کورٹ بار کی کابینہ بھی موجود رہی۔ درخواست گزار میاں داؤد عدالت میں پیش نہ ہوئے اور التواء کی درخواست کی، تاہم عدالت نے کارروائی جاری رکھتے ہوئے جسٹس طارق محمود جہانگیری کو عبوری طور پر کام سے روک دیا۔ دوران سماعت وکیل راجہ علیم عباسی نے نشاندہی کی کہ یہ ایک خطرناک ٹرینڈ بن سکتا ہے، جس پر عدالت نے آئینی سوال اٹھایا کہ اگر معاملہ سپریم جوڈیشل کونسل میں زیر التوا ہو تو ہائی کورٹ اس پر کارروائی کر سکتی ہے یا نہیں؟ عدالت نے کیس کی مزید سماعت مؤخر کر دی اور سپریم جوڈیشل کونسل کے فیصلے تک کیس کو ملتوی کر دیا۔ اس کے ساتھ ہی سینئر قانون دان بیرسٹر ظفر اللہ خان اور اشتر علی اوصاف کو عدالتی معاونین مقرر کیا گیا ہے۔