پاکستانی اداکار احد رضا کی ایک ویڈیو سوشل میڈیا پر تیزی سے وائرل ہو رہی ہے جس میں انہیں بیرونِ ملک ایک مایوں کی تقریب میں خوشی سے رقص کرتے دیکھا جا سکتا ہے۔ ویڈیو میں ان کے ساتھ ان کے اہلِ خانہ بھی ڈھول کی تھاپ پر بھنگڑا ڈالتے دکھائی دے رہے ہیں، جس نے مداحوں اور صارفین کے درمیان ایک نئی بحث چھیڑ دی ہے۔ سوشل میڈیا پر متعدد افراد اس ویڈیو کو احد رضا میر کی ممکنہ دوسری شادی سے جوڑ رہے ہیں اور تبصرے کر رہے ہیں کہ شاید یہ ان کی شادی کی تقریبات کا آغاز ہے۔

تاہم، کچھ پلیٹ فارمز پر وضاحت دی گئی ہے کہ یہ ویڈیو دراصل احد رضا میر کی کزن کی شادی کی ہے، نہ کہ ان کی اپنی۔ مزید دلچسپی اس وقت بڑھی جب تقریب میں معروف اداکارہ دنانیر مبین کو بھی ان کی والدہ اور بہن کے ساتھ دیکھا گیا، جنہیں احد رضا کی والدہ کے ساتھ تصاویر میں بھی دیکھا جا سکتا ہے۔ اس صورتحال نے سوشل میڈیا صارفین کو مزید تجسس میں مبتلا کر دیا ہے اور افواہوں کا بازار گرم کر رکھا ہے، تاہم اب تک احد رضا میر کی جانب سے اس معاملے پر کوئی باضابطہ وضاحت سامنے نہیں آئی۔

پنجابی فلم “سردار جی 3” کا آفیشل ٹریلر جاری کر دیا گیا ہے، جس میں پاکستانی اداکارہ ہانیہ عامر کی جھلک دیکھ کر مداح خوشی سے حیران رہ گئے۔ یوٹیوب پر وائٹ ہِل میوزک کے چینل سے جاری ہونے والے اس ٹریلر میں دلجیت دوسانجھ، نیرو باجوہ، ہانیہ عامر، ناصر چنیوٹی سمیت دیگر معروف فنکار جلوہ گر ہیں۔ فلم کی شوٹنگ برطانیہ میں مکمل کی گئی ہے۔ ہانیہ عامر کی فلم میں شمولیت پر پہلے خدشات کا اظہار کیا جا رہا تھا، کہا جا رہا تھا کہ ان کا کردار نکال دیا گیا ہے اور ان کے مناظر دوبارہ شوٹ کیے گئے ہیں، تاہم ٹریلر میں ان کے بھرپور مناظر دیکھ کر مداح خوشی سے جھوم اٹھے۔

سوشل میڈیا پر مداحوں نے ہانیہ کی موجودگی اور اداکاری کو سراہتے ہوئے کہا کہ انہوں نے ’میرے ہمسفر‘ سے لے کر اب بین الاقوامی پنجابی سنیما میں اپنی شناخت قائم کر لی ہے۔ ایک صارف نے طنزیہ انداز میں لکھا، “کہاں گئے وہ لوگ جو کہہ رہے تھے کہ ہانیہ فلم سے نکال دی گئی ہیں؟”

کامیڈی سے بھرپور “سردار جی 3” 27 جون کو مختلف ممالک میں ریلیز کی جائے گی۔ بعض رپورٹس کے مطابق، پاک بھارت کشیدگی کے باعث بھارتی سینما میں اس فلم کی نمائش نہیں کی جا رہی، کیونکہ بھارت میں ایک بار پھر پاکستانی فنکاروں کے ساتھ کام کرنے پر پابندی لگا دی گئی ہے۔ اس کے باوجود ہانیہ عامر ایک بھارتی پنجابی فلم میں جلوہ گر ہونے میں کامیاب ہو چکی ہیں، جو ان کے کیریئر کے لیے ایک بڑی کامیابی سمجھی جا رہی ہے۔