راولپنڈی:
عوامی مسلم لیگ کے سربراہ شیخ رشید نے کہا ہے کہ وقت آنے پر دنیا دیکھے گی کہ پاکستانی قوم کتنی عظیم اور متحد ہے، ہر فرد اور ہر بچہ وطن عزیز کی حفاظت کے لیے تیار ہے، پاکستانی قوم اپنے وطن کے چپے چپے کا دفاع کرنا جانتی ہے۔

راولپنڈی کی عدالت میں پیشی کے موقع پر میڈیا سے گفتگو کرتے ہوئے شیخ رشید نے کہا کہ بھارت ایک جانب جنگ کی باتیں کر رہا ہے اور دوسری طرف مذاکرات کی بھی کوششیں جاری رکھے ہوئے ہے۔ تاہم انہوں نے امید ظاہر کی کہ حالات جنگ کی طرف نہیں جائیں گے، کیونکہ اگر ایسا ہونا ہوتا تو اب تک معاملات بہت زیادہ بگڑ چکے ہوتے۔

انہوں نے واضح الفاظ میں کہا کہ اگر بھارت نے پاکستانی قوم کو للکارا تو ہر فرد ملک کی حفاظت کے لیے میدان میں ہوگا۔ شیخ رشید نے کہا کہ پاکستانی عوام اپنے وطن اور دین اسلام کے لیے ہر قربانی دینے کو تیار ہیں۔

ان کا کہنا تھا کہ بھارت کسی بھول میں نہ رہے، کسی بھی قسم کی مہم جوئی یا جارحیت کا منہ توڑ جواب دیا جائے گا۔ اس وقت پوری قوم وطن کے دفاع کے لیے ایک پیج پر ہے۔

سابق وفاقی وزیر نے مزید کہا کہ سندھ طاس معاہدے کو معطل کرنا بھارت کی آبی دہشت گردی ہے، اور بھارت یکطرفہ طور پر یہ معاہدہ معطل نہیں کر سکتا۔ انہوں نے کہا کہ پانی روکنا جنگ کے مترادف عمل ہے اور اس طرح کی کارروائیاں بھارت کے غرور اور تکبر کا مظہر ہیں۔

شیخ رشید نے واضح کیا کہ پاکستان کی سلامتی ہمیں جان سے زیادہ عزیز ہے، اور پاکستانی قوم اپنی فوج کے شانہ بشانہ کھڑی ہے۔ انہوں نے بھارت کو متنبہ کیا کہ ہم ان کی چالاکیوں اور دھوکہ دہی پر مبنی حربوں سے بخوبی واقف ہیں۔

انہوں نے کہا کہ اندرونی اختلافات اپنی جگہ، لیکن جب بات پاکستان کی سلامتی کی ہو تو پوری قوم یکجا ہو جاتی ہے۔ بھارت اگر کوئی غلط قدم اٹھائے گا تو اسے ترکی بہ ترکی جواب دیا جائے گا۔