امیر جماعت اسلامی پاکستان حافظ نعیم الرحمن نے ملائیشیا میں ہونے والی مسلم امہ انٹرنیشنل فورم 2025 (MUNIF) سے خطاب کرتے ہوئے اسلامی دنیا کے حکمرانوں پر زور دیا کہ وہ غزہ میں اسرائیلی جارحیت روکنے کے لیے محض بیانات کے بجائے عملی اقدامات کریں۔ 71ویں سالانہ موتمر کانفرنس میں مہمان خصوصی کی حیثیت سے خطاب کرتے ہوئے انہوں نے کہا کہ امت مسلمہ کو اتحاد، معاشی و تجارتی تعاون اور نوجوان نسل کے تبادلے جیسے اقدامات کے ذریعے مضبوط کیا جا سکتا ہے۔ حافظ نعیم کا کہنا تھا کہ اسلامی دنیا تعلیم اور ٹیکنالوجی کے میدان میں ترقی کیے بغیر اپنا کھویا ہوا مقام حاصل نہیں کر سکتی۔ انہوں نے استعماری قوتوں، خصوصاً امریکہ کی جانب اشارہ کرتے ہوئے کہا کہ یہ طاقتیں اسلامی ممالک کے وسائل پر قابض ہیں اور ان سے نجات ناگزیر ہے۔

کانفرنس میں دنیا بھر سے اسلامی تحریکوں کے قائدین، علماء اور دانشور شریک ہوئے جن میں نائب امیر جماعت اسلامی بنگلہ دیش پروفیسر مجیب الرحمن، نائب امیر جماعت اسلامی پاکستان ڈاکٹر عطاء الرحمن سمیت دیگر رہنما شامل تھے۔ اس موقع پر حافظ نعیم الرحمن نے ملائیشین اسلامی پارٹی (PAS) کے قائد اور معروف اسلامی سکالر عبدالہادی اواغ سے بھی ملاقات کی، جس میں فلسطین، جنوبی ایشیا اور جنوب مشرقی ایشیائی خطے کے مسائل پر تفصیلی گفتگو کی گئی۔ دونوں رہنماؤں نے اسلامی تحریکوں کے درمیان ہم آہنگی، امن اور ترقی کے لیے جدوجہد تیز کرنے پر اتفاق کیا۔ حافظ نعیم نے خاص طور پر نوجوانوں کے درمیان روابط بڑھانے کی ضرورت پر بھی زور دیا۔ اس موقع پر انہوں نے اسلامک سرکل آف ملائیشیا (ICM) کے رہنماؤں سے بھی ملاقاتیں کیں اور باہمی دلچسپی کے امور پر تبادلہ خیال کیا۔

پاکستان کرکٹ بورڈ (پی سی بی) کی جانب سے ایشیا کپ 2025 سے دستبرداری پر غور کیا جا رہا ہے، جس کے لیے حکومت سے مشاورت طلب کر لی گئی ہے۔ یہ صورتحال اس وقت پیدا ہوئی جب پاک بھارت میچ میں متنازعہ کردار ادا کرنے والے میچ ریفری اینڈی پائی کرافٹ کو ہٹانے کا پاکستان کا مطالبہ آئی سی سی نے مسترد کر دیا۔ کرکٹ ویب سائٹس کے مطابق، آئی سی سی کا مؤقف ہے کہ ہینڈ شیک تنازع میں پائی کرافٹ کا کردار نہ ہونے کے برابر ہے اور انہوں نے کسی دباؤ میں آ کر کوئی فیصلہ نہیں کیا۔ پی سی بی نے اس مؤقف کو تسلیم کرنے سے انکار کرتے ہوئے کہا ہے کہ اگر ریفری کو نہیں ہٹایا گیا تو پاکستان باقی میچز نہیں کھیلے گا۔ اس حوالے سے پی سی بی نے حکومت سے رائے مانگی ہے اور ایک اہم اجلاس بھی طلب کر لیا گیا ہے تاکہ آئندہ کے لائحہ عمل پر فیصلہ کیا جا سکے۔ چیئرمین پی سی بی محسن نقوی کا کہنا ہے کہ میچ ریفری نے کرکٹ کی روح کے خلاف اقدامات کیے اور ان کے خلاف باقاعدہ شکایت درج کرا دی گئی ہے۔