ہالی وڈ کے سپر اسٹار جانی ڈیپ نے ایک بار پھر اپنے مشہور کردار کیپٹن جیک اسپیرو کا روپ بچوں کی خوشی کے لیے اپنایا ہے، لیکن اس بار کسی فلم کے سیٹ پر نہیں بلکہ اسپین کے ایک اسپتال میں۔ 62 سالہ ڈیپ نے میڈرڈ کے چلڈرن اسپتال کا دورہ کیا، جہاں وہ مختلف کمروں میں جا کر زیرِ علاج بچوں سے ملے، ان کے ساتھ وقت گزارا اور انہیں خوشی فراہم کرنے کی کوشش کی۔ ان کی بچوں کے ساتھ ملاقات کی ویڈیوز اور تصاویر سوشل میڈیا پر تیزی سے وائرل ہو رہی ہیں اور صارفین کی جانب سے ان کے اس عمل کو بے حد سراہا جا رہا ہے۔

جانی ڈیپ ان دنوں اسپین میں اپنی نئی فلم “ڈے ڈرنکر” کی شوٹنگ میں مصروف ہیں اور خبریں گردش کر رہی ہیں کہ وہ جلد ہی “پائریٹس آف دی کیریبین” سیریز کے چھٹے حصے میں کیپٹن جیک اسپیرو کے طور پر واپسی کریں گے۔ یہ پہلا موقع نہیں ہے کہ ڈیپ نے انسانیت کی خدمت کے لیے اپنا مشہور کردار اپنایا ہو۔ اس سے قبل وہ ستمبر 2024 میں سین سبسٹین کے اسپتال کے بچوں سے بھی جیک اسپیرو کے روپ میں مل چکے ہیں۔ علاوہ ازیں، وہ وینکوور، پیرس، لندن، برسبین اور امریکہ کے مختلف شہروں میں بھی بچوں سے اسی روپ میں ملاقات کر چکے ہیں، جو ان کی انسان دوستی اور ہمدردی کا مظہر ہے

فیلڈ مارشل عاصم منیر نے کہا ہے کہ پاکستان علاقائی کشیدگی میں کمی اور تعاون پر مبنی سکیورٹی فریم ورک کے فروغ میں ایک فعال اور ذمے دار کردار ادا کرتا رہے گا، اور عالمی امن کیلئے دی گئی پاکستان کی جانی و مالی قربانیاں اس کے عزم کا ثبوت ہیں۔ ان خیالات کا اظہار فیلڈ مارشل عاصم منیر نے اپنے سرکاری دورہ امریکہ کے دوران واشنگٹن ڈی سی میں تھنک ٹینکس، عالمی پالیسی ماہرین، سینئر اسکالرز اور بین الاقوامی میڈیا نمائندوں سے ملاقات کے دوران کیا۔ آئی ایس پی آر کے مطابق فیلڈ مارشل نے پاکستان کی دہشت گردی کے خلاف جنگ میں شمولیت، آپریشنز “معرکہ حق” اور “بنیان مرصوص” کی تفصیلات بیان کرتے ہوئے پاکستان کے نقطہ نظر کی وضاحت کی۔ انہوں نے بتایا کہ پاکستان دہشت گردی کے خلاف جنگ میں صف اول میں رہا ہے، اور بعض علاقائی ریاستی عناصر ہائبرڈ وارفیئر کے تحت دہشت گردی کو بطور آلہ استعمال کر رہے ہیں جو عالمی اور علاقائی استحکام کیلئے خطرہ ہیں۔

انہوں نے اس بات پر زور دیا کہ پاکستان ایک ذمہ دار ریاست کے طور پر قانون پر مبنی بین الاقوامی نظام کی حمایت کرتا ہے اور علاقائی امن کے قیام کیلئے ہر سطح پر کردار ادا کر رہا ہے۔ آرمی چیف نے اپنی گفتگو میں پاکستان کی معاشی صلاحیتوں کو اجاگر کیا اور عالمی سرمایہ کاروں کو آئی ٹی، زراعت، معدنیات اور کان کنی سمیت مختلف شعبوں میں تعاون کی دعوت دی۔ ملاقات کے دوران پاک-امریکہ دیرینہ تعلقات اور باہمی مفادات کا بھی جائزہ لیا گیا، جہاں فیلڈ مارشل نے کہا کہ انسداد دہشت گردی، سلامتی اور اقتصادی ترقی جیسے شعبوں میں دونوں ممالک کی ہم آہنگی موجود ہے۔

انہوں نے دو طرفہ تعاون کو باہمی احترام، اسٹریٹجک اشتراک اور اقتصادی انحصار کی بنیاد پر مزید وسعت دینے کی ضرورت پر بھی زور دیا۔ شرکاء نے فیلڈ مارشل کے خیالات اور موقف کو سراہا اور اسے پاکستان کی شفاف سفارتکاری اور اصولی موقف کا عکاس قرار دیا۔ انہوں نے واضح کیا کہ پاکستان ہمیشہ مذاکرات، سفارت کاری اور بین الاقوامی قانون کی پاسداری کا حامی رہا ہے اور مستقبل میں بھی علاقائی کشیدگی کم کرنے کیلئے اپنا مثبت کردار جاری رکھے گا۔