راولپنڈی: پاکستان تحریک انصاف کے بانی چیئرمین عمران خان کی ہمشیرہ علیمہ خان اور دیگر قریبی رشتہ داروں کو سابق وزیراعظم سے ملاقات کی اجازت دے دی گئی ہے۔ یہ فیصلہ راولپنڈی کی انسدادِ دہشت گردی عدالت نے اسلام آباد ہائیکورٹ کے 23 مارچ کے فیصلے کی روشنی میں سنایا۔

تفصیلات کے مطابق علیمہ خان نے جیل حکام کی جانب سے ملاقات نہ کرانے پر عدالت سے رجوع کیا تھا۔ درخواست میں مؤقف اختیار کیا گیا کہ طے شدہ شیڈول کے مطابق منگل کے روز عمران خان سے ملاقات ہونا تھی جو جیل حکام نے روک دی۔ عدالت سے درخواست کی گئی کہ سپریٹنڈنٹ جیل کو ہدایت دی جائے کہ ملاقات کرائی جائے۔ انسداد دہشت گردی عدالت کے جج امجد علی شاہ نے درخواست پر سماعت کرتے ہوئے جیل حکام کو ہدایت کی کہ اسلام آباد ہائیکورٹ کے حکم کے مطابق علیمہ خان سمیت فیملی ممبران کو عمران خان سے ملاقات کی اجازت دی جائے۔

گزشتہ روز میڈیا سے غیر رسمی گفتگو کرتے ہوئے علیمہ خان نے الزام عائد کیا کہ جیل حکام کی جانب سے ملاقات روکنے کے پیچھے کوئی پوشیدہ قوتیں کام کر رہی ہیں۔ ان کا کہنا تھا کہ “ہم جس سے بھی بات کرتے ہیں وہ کہتا ہے کہ ہم مجبور ہیں، پرائم منسٹر بھی کہتا ہے کہ میں مجبور ہوں، ہمیں سمجھ نہیں آ رہی کہ یہ آرڈر آ کہاں سے رہے ہیں۔”

علیمہ خان نے مزید کہا کہ عمران خان کو پہلے ہی ملک چھوڑنے یا دو سال کے لیے خاموشی اختیار کرنے کی پیشکش کی جا چکی ہے۔ انہوں نے کہا کہ “تین ہفتے ہو گئے ہیں، ہمیں عمران خان سے ملاقات نہیں کروائی جا رہی۔ انہیں قید میں رکھ کر آخر کس چیز کا انتظار کیا جا رہا ہے؟”

انہوں نے مطالبہ کیا کہ پاکستان میں پولیس اور عدلیہ کی آزادی کے لیے عوامی سطح پر تحریک چلانے کی ضرورت ہے، کیونکہ اگر ادارے آزاد نہ ہوں تو نہ انصاف ممکن ہے اور نہ ہی عوام کو تحفظ مل سکتا ہے۔