عمران خان کی بہن علیمہ خان نے صحافیوں کے سامنے کئی سوالات اٹھا دیے۔ میڈیا سے بات کرتے ہوئے انہوں نے کہا کہ عمران خان خاموش کیوں ہیں؟ کیا وہ چاہتے ہیں کہ بھارت یہ سوچے کہ وہ ملک کے بارے میں بات نہیں کریں گے؟ وہ کون ہے جو انہیں خاموش کروانا چاہتا ہے؟ نام بتائیں، وہ کون ہے؟ علیمہ خان نے یہ بھی بتایا کہ جب عمران خان آخری بار ہم سے ملے تو انہوں نے پوچھا، “کیا میں نے نہیں کہا تھا کہ میں نہ پریشر لوں گا اور نہ ہی ڈیل کروں گا؟” میں نے جواب دیا کہ جی، آپ نے کہا تھا کہ آپ ڈیل نہیں کریں گے، اس طرح عمران خان مجھ سے یہ چیک کرتے ہیں کہ میں نے ان کی بات کو صحیح طور پر سمجھا یا نہیں۔

علیمہ خان نے مزید کہا کہ امریکی وفد اپنی مرضی سے پاکستان آ رہا ہے، ہمیں اس بارے میں زیادہ معلومات نہیں ہیں، ہم تو وہی بات کرتے ہیں جو عمران خان ہمیں بتاتے ہیں۔ انہوں نے یہ بھی کہا کہ عمران خان کو بہت پہلے ملک چھوڑنے یا دو سال کے لیے خاموش رہنے کی پیشکش کی گئی تھی۔ اب تین ہفتے ہو چکے ہیں کہ ہمیں عمران خان سے ملنے نہیں دیا جا رہا، آپ انہیں بند کر کے کس چیز کا انتظار کر رہے ہیں؟ اگر آج بانی پی ٹی آئی سے ملاقات نہیں کرائی گئی تو ہم وہاں دھرنا دیں گے۔

یہ بھی بتایا جا رہا ہے کہ پاکستان تحریک انصاف کے رہنما اور جیل میں ملاقاتوں کے کوآرڈینیٹر سلمان اکرم راجہ نے عمران خان سے ملاقات کے لیے پارٹی رہنماوں کی فہرست جیل سپرنٹنڈنٹ کو بھیج دی ہے۔