پاکستان اور بیلاروس کے درمیان فوجی تعاون، تجارت، اور دیگر شعبوں میں کئی معاہدے اور ایم او یوز پر دستخط کیے گئے ہیں، جس سے دونوں ممالک کے تعلقات ایک نئے دور میں داخل ہو گئے ہیں۔ اس حوالے سے معاہدوں اور مفاہمتی یادداشتوں کے تبادلے کی تقریب کا انعقاد کیا گیا، جس میں وزیراعظم شہباز شریف اور بیلاروس کے صدر الیگزینڈر لوکاشینکو نے شرکت کی۔

وزیراعظم شہباز شریف سرکاری دورے پر بیلاروس پہنچے، جہاں صدر الیگزینڈر لوکاشینکو نے ان کا گرمجوشی سے استقبال کیا۔ مسلح افواج نے انہیں سلامی دی اور گارڈ آف آنر پیش کیا، جبکہ دونوں ممالک کے قومی ترانے بھی بجائے گئے۔ تقریب کے دوران پاکستان اور بیلاروس کی وزارت دفاع کے درمیان فوجی تعاون کا معاہدہ طے پایا۔

اس کے علاوہ، بیلاروس کی داخلی امور کی وزارت اور پاکستان کی وزارت داخلہ کے درمیان بھی تعاون کا معاہدہ ہوا۔ بیلاروس کی فوجی صنعت کی سٹیٹ اتھارٹی اور پاکستان کی وزارت دفاعی پیداوار کے درمیان 2025 سے 2027 تک فوجی تکنیکی تعاون کا روڈ میپ بھی طے کیا گیا۔ دونوں ممالک کے درمیان ری ایڈمیشن معاہدہ بھی طے پایا ہے۔ پاکستان کے ٹی ڈی اے پی (ٹریڈ ڈیولپمنٹ اتھارٹی) اور بیلاروس کے ایوان صنعت و تجارت کے درمیان بھی ایک معاہدہ ہوا، جبکہ بیلاروس کے محکمہ پوسٹ اور پاکستان پوسٹ کے درمیان بھی معاہدہ کیا گیا، جس کا مقصد پوسٹل خدمات کے درمیان سہولیات فراہم کرنا ہے۔

ضلع لوئر دیر کے علاقے تیمرگرہ میں سیکیورٹی فورسز نے خفیہ اطلاعات کی بنیاد پر ایک کامیاب انٹیلی جنس بیسڈ آپریشن کیا، جس کے نتیجے میں ہائی ویلیو ٹارگٹ خارجی سمیت دو دہشت گرد ہلاک کر دیے گئے۔ پاک فوج کے شعبہ تعلقات عامہ (آئی ایس پی آر) کے مطابق، مارے جانے والوں میں انتہائی مطلوب دہشت گرد حفیظ اللہ عرف کوچوان بھی شامل تھا۔

آئی ایس پی آر کے مطابق یہ آپریشن 10 اور 11 اپریل کی درمیانی شب انجام دیا گیا، جس کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔ خارجی حفیظ اللہ عرف کوچوان نہ صرف سیکیورٹی فورسز بلکہ معصوم شہریوں پر حملوں میں بھی ملوث تھا اور قانون نافذ کرنے والے اداروں کو طویل عرصے سے مطلوب تھا۔ حکومت پاکستان نے اس کے سر کی قیمت ایک کروڑ روپے مقرر کر رکھی تھی۔

سیکیورٹی فورسز نے علاقے کو مکمل طور پر گھیرے میں لے کر خوارج کے ٹھکانے کو نشانہ بنایا اور کامیاب کارروائی کے بعد دو دہشت گردوں کو ہلاک کیا۔ آئی ایس پی آر کا کہنا ہے کہ علاقے میں مزید خوارج کی موجودگی کے خدشے کے پیش نظر کلیئرنس آپریشن جاری ہے۔

اس اہم کامیابی پر وزیراعظم شہباز شریف اور وزیر داخلہ محسن نقوی نے سیکیورٹی فورسز کو خراج تحسین پیش کیا۔ وزیراعظم نے کہا کہ
“انسانیت کے دشمنوں کے مذموم عزائم کو اسی طرح خاک میں ملاتے رہیں گے۔ ملک سے دہشتگردی کے خاتمے اور قیامِ امن کے لیے پوری قوم سیکیورٹی فورسز کے ساتھ کھڑی ہے۔”

وفاقی وزیر داخلہ نے بھی کہا کہ
“سیکیورٹی فورسز نے بروقت کارروائی کرکے خوارجیوں کے ناپاک عزائم کو ناکام بنایا، ان کی پیشہ وارانہ مہارت اور قربانیوں کو پوری قوم سلام پیش کرتی ہے۔”

اس سے قبل 6 اور 7 اپریل کی درمیانی شب ڈیرہ اسماعیل خان کے علاقے ٹکوارہ میں کیے گئے ایک اور خفیہ آپریشن میں انتہائی مطلوب خارجی کمانڈر شیرین سمیت 9 دہشت گرد ہلاک کیے گئے تھے۔ ان خوارج کے ٹھکانے کو بھی مؤثر انداز میں نشانہ بنایا گیا تھا، اور ان کے قبضے سے اسلحہ اور گولہ بارود برآمد کیا گیا تھا۔

یہ تمام کامیابیاں پاک فوج اور سیکیورٹی اداروں کی پیشہ ورانہ صلاحیت، جرأت اور عزم کا منہ بولتا ثبوت ہیں۔ ملک سے دہشت گردی کے ناسور کے خاتمے تک سیکیورٹی فورسز کی کارروائیاں جاری رہیں گی۔