پاکستان چائنا انسٹی ٹیوٹ نے جنوبی ایشیا میں جاری جغرافیائی و دفاعی تبدیلیوں پر مبنی رپورٹ جاری کی ہے، جس کا اجراء سینیٹر مشاہد حسین سید نے کیا۔ رپورٹ میں 3 نکاتی جامع حکمت عملی پیش کی گئی ہے، جس کے تحت چین، ترکیہ، ایران، آذربائیجان اور سعودی عرب جیسے اہم اتحادیوں کے ساتھ تعلقات کو مزید مضبوط کرنے کی تجویز دی گئی ہے۔

رپورٹ میں اس بات پر زور دیا گیا ہے کہ بھارت کی موجودہ قیادت کی جانب سے پاکستان کے حوالے سے کیے گئے اندازے غلط ثابت ہوئے ہیں اور پاکستان نے واضح دفاعی برتری حاصل کی ہے۔ 10 مئی کو ہونے والی فتح کو “پاکستان کا شاندار ترین لمحہ” قرار دیا گیا ہے، جب کہ پاک فضائیہ کی پیشہ ورانہ مہارت، الیکٹرانک وارفیئر اور سائبر میدان میں برتری کو اہم قرار دیا گیا۔

مزید کہا گیا ہے کہ بھارت کے ہندوتوا نظریے کو عالمی عدالتوں میں چیلنج کیا جانا چاہیے، جب کہ بلینس آف ٹیرر کا ماڈل خطے میں امن و استحکام قائم رکھنے میں مؤثر رہا ہے۔ رپورٹ میں پہلگام واقعے کے بعد کے واقعات کی ٹائم لائن اور بین الاقوامی تجزیے بھی شامل کیے گئے ہیں۔ سینیٹر مشاہد حسین کے مطابق چین اب مسئلہ کشمیر کا عملی فریق بن چکا ہے۔

وزیرِ اعظم پاکستان شہباز شریف 29 مئی سے 30 مئی 2025 تک ترکیہ، ایران، آذربائیجان اور تاجکستان کا اہم سفارتی دورہ کریں گے۔ ترجمان دفتر خارجہ کے مطابق یہ دورہ علاقائی تعلقات، عالمی امور اور موجودہ جغرافیائی سیاسی صورتحال پر تبادلہ خیال کے لیے نہایت اہمیت کا حامل ہے۔

اس دوران وزیرِ اعظم مختلف دوست ممالک کی قیادت سے دوطرفہ تعاون، تجارتی مواقع، علاقائی سلامتی اور حالیہ پاک-بھارت کشیدگی جیسے امور پر بات چیت کریں گے۔ وزیرِ اعظم ان ممالک کی جانب سے بھارت کے خلاف پاکستان کی حمایت پر شکریہ بھی ادا کریں گے۔

وزیرِ اعظم 29 اور 30 مئی کو دوشنبے (تاجکستان) میں ایک بین الاقوامی کانفرنس میں شرکت بھی کریں گے، جہاں خطے کی ترقی، تعاون اور امن کے لیے تبادلہ خیال کیا جائے گا۔