پاکستانی شوبز کی سینئر اداکارہ اور سماجی کارکن نادیہ جمیل نے حالیہ انسٹاگرام پوسٹ میں اپنے اس بیان کی وضاحت پیش کی ہے جس میں انہوں نے کہا تھا کہ “عورت کو شوہر کی ماں نہیں بننا چاہیے”۔ اس بیان کی ایک ویڈیو سوشل میڈیا پر وائرل ہوئی تھی، جسے کچھ صارفین نے اس انداز میں لیا کہ جیسے وہ بیوی کی طرف سے شوہر کا خیال رکھنے کے کردار کو مسترد کر رہی ہیں۔ تاہم، نادیہ جمیل نے اپنی وضاحت میں کہا کہ ان کا مقصد ہرگز ماں کے کردار کی اہمیت کو کم کرنا نہیں تھا بلکہ وہ یہ بتانا چاہ رہی تھیں کہ شوہر اور بیوی کا ایک دوسرے سے تعلق اور ذمہ داریاں مختلف نوعیت کی ہوتی ہیں۔ انہوں نے کہا کہ ماں کی جگہ کوئی نہیں لے سکتا، اور بیوی کا شوہر کا خیال رکھنا فطری بات ہے، لیکن اسے ماں کے کردار سے تشبیہ دینا درست نہیں۔ نادیہ جمیل نے واضح کیا کہ وہ اور ان کے شوہر ایک دوسرے کی دیکھ بھال ضرور کرتے ہیں، لیکن وہ ایک دوسرے کے والدین کا کردار ادا نہیں کرتے۔ ان کے بقول، محبت اور تعلق کے انداز ہر رشتے میں مختلف ہوتے ہیں، اور یہ ہر جوڑے کا ذاتی معاملہ ہے کہ وہ اپنی حدود اور ذمہ داریاں کس طرح متعین کرتے ہیں۔

معروف پاکستانی ہدایتکارہ مہرین جبار نے پاکستانی ڈرامہ انڈسٹری میں ادائیگیوں سے متعلق سنگین مسائل کا انکشاف کیا ہے۔ ایک حالیہ یوٹیوب انٹرویو میں گفتگو کرتے ہوئے انہوں نے بتایا کہ اگرچہ انڈسٹری نے کئی لحاظ سے ترقی کی ہے، لیکن پیشہ ورانہ رویوں کی کمی خاص طور پر ادائیگیوں کے معاملے میں اب بھی ایک بڑا چیلنج ہے۔ مہرین جبار، جو دام، دوراہا، جیکسن ہائٹس اور ایک جھوٹی لو اسٹوری جیسے کامیاب ڈرامے بنا چکی ہیں، ان دنوں ایک نئے پراجیکٹ پر کام کر رہی ہیں جس میں عدیل حسین، حاجرا یامین اور شجاع اسد شامل ہیں۔ انہوں نے افسوس کا اظہار کیا کہ اکثر پروڈکشن ہاؤسز وقت پر ادائیگی نہیں کرتے اور فنکاروں، ہدایتکاروں، یہاں تک کہ اسپاٹ بوائز کو بھی بار بار تقاضا کرنا پڑتا ہے، جیسے وہ تنخواہ نہیں بلکہ کسی سے خیرات مانگ رہے ہوں۔ انہوں نے مزید کہا کہ تکنیکی عملے کی تنخواہیں بہت کم ہوتی ہیں اور بجٹ بچانے کے لیے ان کا استحصال کیا جاتا ہے۔ مہنگائی کے اس دور میں یہ رویہ ناقابلِ قبول ہے اور مہرین جبار کے مطابق اس نظام کو فوری طور پر بہتر بنانے کی ضرورت ہے۔