سیکرٹری جنرل عوام پاکستان پارٹی مفتاح اسماعیل نے کہا ہے کہ حکومت صرف معیشت کے مثبت اشاریے پیش کر رہی ہے، جبکہ منفی اشاریے نظر انداز کیے جا رہے ہیں۔ انہوں نے کہا کہ دنیا میں تیل اور اشیاء کی قیمتیں کم ہونے پر حکومت خوشی منارہی ہے، جبکہ اس کی ساری توجہ اپنی کرسی بچانے پر مرکوز ہے۔ جب حکومت مہنگائی میں کمی کی بات کرتی ہے تو یہ بھی بتانا چاہیے کہ 38 فیصد مہنگائی کا ذمہ دار کون ہے؟ انہوں نے اے آروائی نیوز کے پروگرام میں گفتگو کرتے ہوئے مزید کہا کہ حکومت نے جو ریفارمز کے وعدے کیے تھے، ان میں سے کوئی بھی پورا نہیں ہوا۔

افراط زر کی شرح کم ہوئی ہے، لیکن مہنگائی میں اضافہ ہوا ہے کیونکہ لوگوں کی آمدن میں کمی آئی ہے، جس کی وجہ سے ان کی قوت خرید متاثر ہوئی ہے اور ضروری اشیاء ان کی دسترس سے باہر ہو گئی ہیں۔

جیسا کہ حفیظ پاشا نے بتایا، ورلڈ بینک کے مطابق پاکستان میں غربت کی شرح 44 فیصد ہے، یعنی تقریباً 10 کروڑ 50 لاکھ لوگ خط غربت سے نیچے زندگی گزار رہے ہیں۔ اتنی بڑی غربت کے پیش نظر ہمیں اصلاحات اور ترقی کی ضرورت ہے۔

دنیا میں تیل اور اشیاء کی قیمتوں میں کمی کی وجہ سے حکومت خوشی منارہی ہے، جبکہ 26ویں ترمیم اور پیکا ایکٹ جیسے معاملات میں اس کی ساری کوششیں اپنی کرسی بچانے پر مرکوز ہیں۔ پنشن ریفارمز، این ایف سی ایوارڈ، نوکریوں میں کمی اور کچھ وزارتوں کو صوبوں کے حوالے کرنے جیسے مسائل پر کوئی توجہ نہیں دی جا رہی۔