پاکستان شوبز کی اداکارہ منشا پاشا نے اپنی پہلی شادی کو اپنی زندگی کا سب سے مشکل وقت قرار دیا ہے۔

حال ہی میں ایک مارننگ شو میں شرکت کرتے ہوئے، منشا پاشانے اپنی زندگی کے چیلنجنگ لمحات پر بات کی اور اپنی پہلی شادی کے تجربات کا ذکر کیا۔

انہوں نے کہا کہ ان کی پہلی شادی اور کالج کے دن ان کی زندگی کے سب سے زیادہ مشکل ادوار تھے۔ اس وقت انہیں مستقبل کے بارے میں بہت سی بے یقینی کا سامنا تھا، لیکن وقت کے ساتھ یہ سمجھ میں آیا کہ یہی مشکلات انسان کی شخصیت کو نکھارنے میں مددگار ثابت ہوتی ہیں۔

منشا نے یہ بھی بتایا کہ 2014-2015 کا دور ان کے لیے خاص طور پر مشکل تھا، جب وہ کام میں مصروف تھیں، شادی شدہ زندگی گزار رہی تھیں، اور اسی دوران ان کے والد کو کینسر کی تشخیص ہوئی جبکہ ان کی والدہ کو دل کا دورہ پڑا۔

اداکارہ نے کہا کہ اس وقت ایسا محسوس ہوتا تھا جیسے سب کچھ بکھر رہا ہو۔

یاد رہے کہ منشا پاشا کی شادی 2013 میں اسد فاروقی سے ہوئی تھی، جو 2018 میں ختم ہوگئی، لیکن اب وہ معروف وکیل جبران ناصر کے ساتھ خوشگوار ازدواجی زندگی گزار رہی ہیں۔

حیدرآباد میں پیدا ہونے والی اور کراچی میں پرورش پانے والی منشا پاشا نے ڈرامہ ’ہمسفر‘ میں ایک معاون کردار کے ذریعے شوبز میں قدم رکھا۔

اداکار فیروز خان اور ایک خاتون صحافی کے درمیان تلخ کلامی کی ویڈیو سوشل میڈیا پر وائرل ہو رہی ہے، یہ واقعہ ایک پریس کانفرنس کے دوران پیش آیا۔

فیروز خان یوٹیوبر راحم پردیسی کے ساتھ ہونے والے باکسنگ میچ کے حوالے سے منعقدہ پریس کانفرنس میں ڈھائی گھنٹے کی تاخیر سے پہنچے۔ اس پر خاتون صحافی نے انہیں تنقید کا نشانہ بنایا۔

خاتون نے کہا کہ میڈیا کو سختی سے تین بجے پہنچنے کی ہدایت کی گئی تھی، اور سب وقت پر موجود تھے، مگر فیروز خان کی دیر سے آمد کی وجہ سے مین اسٹریم میڈیا کے بیشتر نمائندے جا چکے ہیں۔

خاتون صحافی نے یہ بھی کہا کہ فنکاروں کو شہرت اللّٰہ کے کرم کے ساتھ ساتھ مداحوں اور میڈیا کی حمایت سے ملتی ہے۔ اس پر فیروز خان نے مداخلت کرتے ہوئے کہا کہ کیا میڈیا ہی ستارے بناتا ہے؟ جبکہ میڈیا تو پچھلے تین سال سے ان کے خلاف ہے۔ صحافی نے اپنا مؤقف دہراتے ہوئے کہا کہ میڈیا ہی فنکاروں کی حمایت اور پروموشن کرتا ہے، مگر یہاں موجود افراد پچھلے ڈھائی گھنٹے سے انتظار کر رہے ہیں۔

جواب میں فیروز خان نے تاخیر کی وضاحت کرتے ہوئے کہا کہ ان کے گھر میں گرم پانی نہیں آ رہا تھا، جس پر خاتون صحافی نے اس جواز کو ناقابل قبول قرار دیتے ہوئے کہا کہ یہ کوئی مذاق نہیں، اور کسی کو اتنی دیر انتظار کروانا غیر مناسب ہے۔

سوشل میڈیا صارفین کی جانب سے فیروز خان پر مختلف ردعمل سامنے آ رہے ہیں۔