عوام پاکستان پارٹی کے سربراہ شاہد خاقان عباسی نے کہا ہے کہ اپوزیشن جماعتوں کی کل پہلی میٹنگ تھی اور اس سلسلے کو آگے بڑھایا جائے گا۔ پہلی میٹنگ میں کوئی اتحاد نہیں بنا، لیکن ملکی حالات پر بات چیت ہوئی۔ انہوں نے کہا کہ جب معاملہ ناکام ہوجائے تو سڑکوں پر آنا آخری حربہ ہوتا ہے، اور ملکی مسائل کا حل آئین کی بالادستی میں ہے۔

جیونیوز کے پروگرام میں گفتگو کرتے ہوئے انہوں نے مزید کہا کہ آئین کی بالادستی اور قانون کی حکمرانی پر سب نے اتفاق کیا ہے۔ پی ٹی آئی نے 8 فروری کو اور مولانا فضل الرحمان نے 10 فروری کو جلسہ کرنا ہے۔

ماضی کے معاملات پر تحفظات موجود ہیں، لیکن اپوزیشن کو ملکی مسائل پر متفقہ موقف اپنانا چاہئے۔ ملک کو ضد سے نہیں بلکہ آئین کے تحت چلایا جانا چاہئے۔ آج ملک کے تشویشناک حالات ہیں، اور اگر سارا معاملہ ناکام ہوجائے تو سڑکوں پر آنا آخری راستہ ہوگا۔ آج ہمیں ملکی مسائل کا حل تلاش کرنا ہے جو آئین کی بالادستی میں ہے۔ ملکی معیشت تباہ ہو چکی ہے اور سیاسی نظام بھی متاثر ہوا ہے۔ 26ویں ترمیم میں مولانا کا کردار اہم تھا، کیونکہ یہ ترمیم ملک کے ایک ادارے کی تباہی کا باعث بنی۔ آج عدل کا نظام ختم ہو چکا ہے، لیکن اگر مولانا اس ترمیم میں کردار ادا نہ کرتے تو حالات بہت مختلف ہوتے۔

پی ٹی آئی کے رہنما کے مطابق یورپی یونین پاکستان کے جی ایس پی اسٹیٹس کا جائزہ لینے کے لیے مدت ختم ہونے سے پہلے ہی متحرک ہو رہا ہے۔ تفصیلات کے مطابق، پاکستان تحریک انصاف کے سینئر رہنما اور سابق سیکرٹری اطلاعات روف حسن نے نجی ٹی وی چینل اے آر وائی نیوز پر صحافی وسیم بادامی سے گفتگو کرتے ہوئے پاکستان کے جی ایس پی اسٹیٹس کے بارے میں ایک اہم انکشاف کیا۔ روف حسن نے بتایا کہ یورپی یونین کی جانب سے ایک بیان جاری ہوا ہے، جس میں کہا گیا ہے کہ وہ مدت ختم ہونے سے پہلے ہی پاکستان کے جی ایس پی اسٹیٹس کا جائزہ لے رہے ہیں۔ انہوں نے مزید کہا کہ صورتحال کافی سنجیدہ ہے، لیکن حکومت کے رویے سے یہ محسوس ہوتا ہے کہ یا تو وہ ان معاملات کو سمجھنے میں ناکام ہے یا پھر سمجھنا ہی نہیں چاہتی۔ حکومت صرف اپنے اقتدار کو برقرار رکھنے کی کوشش کر رہی ہے جبکہ ملک تباہی کے دہانے پر ہے۔

دوسری جانب، حکومتی رہنما بیرسٹر عقیل نے نجی ٹی وی چینل سماء نیوز پر صحافی ندیم ملک سے گفتگو کرتے ہوئے بتایا کہ جی ایس پی پلس اسٹیٹس کا جائزہ جون میں لیا جائے گا۔ انہوں نے کہا کہ یورپی یونین اپنا سسٹم تبدیل کر رہی ہے، اور اس تبدیلی کے بعد ہمیں 2027 میں نئی درخواست دینا ہوگی۔ آئی سی سی پی آر کے جائزے میں ملٹری کورٹس اور آزادی اظہار پر بھی بات چیت ہوئی، اور ہم نے تمام ملاقاتوں میں تحفظات دور کرنے کی کوشش کی۔