اسلام آباد ہائی کورٹ کے جسٹس محسن اختر کیانی نے کہا ہے کہ بدقسمتی سے پاکستان میں ماؤں نے مردوں کی تربیت ٹھیک نہیں کی۔

اسلام آباد ہائی کورٹ میں بچے کی حوالگی سے متعلق کیس کی سماعت ہوئی۔ عدالت نے فیصلہ محفوظ کر لیا۔ جسٹس محسن اختر کیانی نے اپنے ساتھ کرسی لگوا کر نو عمر بچے کو بٹھایا۔

جسٹس محسن اختر کیانی نے ریمارکس میں کہا کہ بدقسمتی سے پاکستان میں ماؤں نے مردوں کی تربیت ٹھیک نہیں کی۔ عدالتیں بدلہ لینے کی جگہ نہیں ہیں اور وکیل بھی ٹولز نہیں ہیں۔ بچوں یا والدین کو عدالتوں میں نہیں آنا چاہیے۔ جہاں والدین ایک دوسرے کی عزت نہیں کرتے، وہاں بچے بھی ان کی عزت نہیں کرتے۔

جسٹس محسن اختر نے کہا کہ فیصلہ آسان ہے لیکن کسی کے دل میں محبت نہیں ڈال سکتے۔ بچوں کو سنبھالنا بہت آسان ہے، چاہے وہ ماں ہو، باپ ہو یا کوئی اور۔ بچہ جس کے ساتھ بھی ہوتا ہے، وہ دوسرے کے خلاف ہو جاتا ہے۔ سات سال یا اس سے بڑے بچے خود کو سنبھالنے کی صلاحیت رکھتے ہیں۔ بچے کو اسی لیے ساتھ بٹھایا گیا ہے تاکہ وہ خود بتا سکے کہ وہ کس کے ساتھ رہنا چاہتا ہے۔ کسی کے ساتھ زبردستی نہیں کی جا سکتی۔ میں اس بچے سے مسلسل پوچھ رہا ہوں تاکہ وہ اپنا نقطہ نظر پیش کر سکے۔ منفی اثرات کو ختم کرنا ضروری ہے۔

عدالت نے والدین سے پوچھا کہ آپ کیا کرتے ہیں اور آپ کی ڈیوٹی کے اوقات کیا ہیں۔ بچے کے والد نے جواب دیا کہ میں نیسکام میں ڈائریکٹر ہوں اور میری ڈیوٹی کے اوقات 9 سے 4 ہیں۔