صوبہ پنجاب میں پتنگ بازی پر مکمل پابندی کا بل صوبائی اسمبلی نے منظور کر لیا ہے، جس کے تحت خلاف ورزی کرنے والوں کو سخت سزائیں دی جائیں گی۔ محکمہ داخلہ پنجاب کے مطابق، صوبائی اسمبلی نے پتنگ بازی پر مکمل پابندی کا ترمیمی ایکٹ 2024 منظور کیا ہے، جس میں پتنگ بازی کو پنجاب میں ناقابل ضمانت جرم قرار دیا گیا ہے۔ اس کے تحت خلاف ورزی پر کم از کم 3 سے 7 سال قید کی سزا ہوگی، جبکہ پتنگ بازی، پتنگ کی تیاری، فروخت اور نقل و حمل پر 5 لاکھ سے 50 لاکھ تک جرمانہ عائد کیا جائے گا۔

محکمہ داخلہ پنجاب نے مزید بتایا ہے کہ پتنگ اڑانے والے کو 3 سے 5 سال قید یا 20 لاکھ جرمانہ یا دونوں سزائیں دی جائیں گی۔ پتنگ ساز اور ٹرانسپورٹر کو 5 سے 7 سال قید یا 50 لاکھ جرمانہ یا دونوں سزائیں ملیں گی۔ اگر کوئی بچہ پتنگ بازی میں ملوث پایا گیا تو پہلی بار 50 ہزار روپے اور دوسری بار ایک لاکھ روپے جرمانہ عائد کیا جائے گا۔ پابندی کا اطلاق پتنگوں، دھاتی تاروں، نائلون کی ڈوری، تندی، اور پتنگ بازی کے لیے استعمال ہونے والے تیز دھار مانجھے کے ساتھ تمام دھاگوں پر ہوگا۔ پتنگ بازی سے متعلقہ مواد کی تیاری اور نقل و حمل پر بھی مکمل پابندی ہوگی۔

بتایا جا رہا ہے کہ پنجاب اسمبلی کے اجلاس میں سینئر وزیر مریم اورنگزیب اور وزیر خزانہ مجتبیٰ شجاع الرحمان نے مسودات قوانین پنجاب تنازعات کا متبادل حل (ترمیمی)، پتنگ بازی ممانعت (ترمیمی)، اور مجرموں کی پروبیشن (ترمیمی) پیش کیے۔