حکومت نے پٹرول اور ڈیزل کی قیمتوں میں اضافہ کرنے کا اعلان کیا ہے، جنوری کے اگلے 16 دنوں کے لیے پٹرول کی فی لیٹر قیمت میں 3 روپے 47 پیسے جبکہ ڈیزل کی قیمت میں 2 روپے 61 پیسے کا اضافہ کیا گیا ہے۔ تفصیلات کے مطابق وفاقی حکومت نے نئے سال کے پہلے مہینے میں مسلسل دوسری بار پٹرولیم مصنوعات کی قیمتوں میں اضافہ کیا ہے۔
پٹرول کی نئی قیمت 3 روپے 47 پیسے اضافے کے بعد 256 روپے 13 پیسے جبکہ ڈیزل کی قیمت 2 روپے 61 پیسے اضافے کے بعد 260 روپے 95 پیسے مقرر کی گئی ہے۔ اوگرا نے قیمتوں میں اضافے کے لیے سمری وزارت خزانہ کو بھیجی، جس کا اطلاق وزیراعظم کی حتمی منظوری کے بعد آج رات 12 بجے سے ہوگا۔ وزیراعظم کی جانب سے منظور کردہ نئی قیمتیں 16 سے 31 جنوری تک نافذ العمل رہیں گی۔

اس سے پہلے نئے سال کے آغاز پر یکم جنوری 2025 کو بھی وفاقی حکومت نے پٹرولیم مصنوعات کی قیمتوں میں 2 روپے 96 پیسے تک کا اضافہ کیا تھا۔ پٹرول کی قیمت میں 56 پیسے فی لیٹر جبکہ ہائی اسپیڈ ڈیزل کی قیمت میں 2 روپے 96 پیسے فی لیٹر کا اضافہ ہوا تھا۔ میڈیا رپورٹس کے مطابق عالمی مارکیٹ میں خام تیل کی قیمتوں میں مسلسل اضافے کا پاکستان پر منفی اثر پڑنے کا خدشہ ہے، اور 16 جنوری سے پاکستان میں تمام پٹرولیم مصنوعات مہنگی ہونے کا امکان ظاہر کیا گیا ہے۔ رپورٹس میں یہ بھی بتایا گیا ہے کہ 16 جنوری سے پٹرول کی قیمت میں 3 روپے کا اضافہ متوقع ہے۔