وزیراعلیٰ مریم نواز نے سی ایم پنجاب لائیوسٹاک کارڈ کا اجراء کرتے ہوئے دیہی خواتین کے لیے 2 ارب روپے کا پیکیج اور پہلی فارمر رہنمائی ایپ متعارف کرائی۔ تفصیلات کے مطابق پنجاب حکومت نے معاشی خودمختاری کے لیے 12 اضلاع کی 11 ہزار دیہی خواتین کے لیے 2 ارب روپے کا ریکارڈ پیکیج فراہم کیا ہے، جس کے تحت دیہی خواتین کو گائے اور بھینسیں مفت فراہم کی جائیں گی تاکہ وہ پالنے اور روزگار کمانے کے قابل ہو سکیں۔ ملتان، خانیوال، لودھراں، وہاڑی، بہاولپور، بہاولنگر اور رحیم یار خان میں دیہی خواتین کے لیے چیف منسٹر لائیوسٹاک پراجیکٹ جاری ہے، جبکہ ڈیرہ غازی خان، لیہ، مظفرگڑھ، راجن پور اور کوٹ ادو کے دیہات میں بھی خواتین کو مفت گائے اور بھینسیں فراہم کی جائیں گی، تاکہ وہ باعزت روزگار حاصل کر سکیں۔

یہ بھی بتایا گیا ہے کہ سی ایم لائیوسٹاک کارڈ کے ذریعے 80 ہزار مویشی پالنے والے فارمرز 27 ہزار روپے فی جانور بلاسود قرض حاصل کر سکیں گے۔ پنجاب بھر میں مویشی پالنے والے فارمرز رجسٹرڈ ڈیلر سے 2 لاکھ 70 ہزار تک ونڈا، منرل مکسچر اور سائلج خرید سکیں گے۔ لائیوسٹاک فارمرز 4 ماہ تک مساوی اقساط میں بلاسود قرض سے ونڈا وغیرہ خریدنے کے اہل ہوں گے۔ لائیوسٹاک کارڈ کے ذریعے چار لاکھ جانور میٹ ایکسپورٹ کے لیے تیار کیے جائیں گے، اور مویشیوں کی دیکھ بھال میں آسانی کے لیے اینیمل آئیڈنٹی ٹریس ایبلٹی سسٹم کا نفاذ کیا جائے گا۔